Islandiya janubi-g‘arbidagi Reykyanes yarim orolida vulqon otildi, natijada mashhur geotermal kurort Moviy laguna va Grindavik kichik shaharchasini evakuatsiya qilishga to‘g‘ri keldi. Bu haqda  "BBC" xabar beradi.

Qayd etilishicha, bu dekabrdan beri ushbu hududda beshinchi vulqon otilishidir.

Favqulodda holat e’lon qilingan, biroq Islandiyaga parvozlar ta’sir qilishi kutilmayapti.

Grindavik meri Fannar Yonasson RUV davlat teleradiokompaniyasiga shahar tomon oqib kelayotgan lava hajmidan xavotirda ekanligini aytgan.

Uning so‘zlariga ko‘ra, lava hajmi oxirgi otilish paytida ko‘rilganidan ancha katta.

Mahalliy elektr ta’minotchisi HS Veitur ma’lumotlariga ko‘ra, Grindavikda ehtiyot chorasi sifatida elektr energiyasi o‘chirilgan.

Mahalliy matbuotning yozishicha, uch kishi shaharni tark etishdan bosh tortgan.

Keyinroq rasmiylar shahar ichida yoki yaqinida qolib ketganlarni hududni tark etishga chaqirdi.

Reykyanes yarim orolida uzoq davom etgan vulqon faolligining oxirgi davri 800-yil oldin bo‘lib, u paytda otilishlar o‘nlab yillar davom etgan.

• Islandiya
• Vulqon