Anqara (Turkiya)dagi og‘ir jinoyatlar bo‘yicha sud mahkamasi bir muddat Markaziy razvedka boshqarmasi (AQSh razvedka tashkiloti)da ishlagani, hamda FETO (Turkiyada faoliyati taqiqlangan tashkilot)ning sobiq razvedka xodimi ekanligi aytilgan Anvar Oltoyli ishi bo‘yicha yakuniy qaror chiqardi.

Sud yetmish yetti yoshli Oltoylini harbiy va siyosiy josuslikda aybdor deb topgan va 13 yilu 4 oyga ozodlikdan mahrum etishga qaror qilgan.

Bundan tashqari, unga FETO terrorchi guruhining a’zosi bo‘lganligi aybi uchun yana 10 yilga ozodlikdan mahrum etish jazosi tayinlandi. Turk hukumati 2016-yildagi davlat to‘ntarishiga urinish uchun aynan FETOni ayblagan. 

Shuningdek, sud majlisida FETO Turkiy Respublikalardagi tashkilotini Oltoyli orqali tashkil qilgani ta’kidlangan. 

“FETOning ayniqsa O‘zbekiston va Qozog‘istonda faol bo‘lishida Oltoyli muhim rol o‘ynadi. U O‘zbekiston va Ozarbayjondagi davlat to‘ntarishiga urinishlar ortida turgani iddao qilindi”,  – deyiladi xabarda.

Ma’lumot uchun, Anvar Oltoyli 1944 yilda tug‘ilgan. U 1968-1973-yillarda Germaniya va Avstriyada Sharqiy Yevropa huquqi va sovetologiya bo‘yicha tahsil olgan.

Shuningdek, u 1991-1993-yillarda O‘zbekistonning birinchi prezidenti Islom Karimovning maslahatchisi bo‘lib ishlagan va uning o‘zbek millatiga mansubligi aytiladi.

• Sud
• Turkiya