Isroil G‘azoda o‘t ochishni to‘xtatish bo‘yicha XAMAS bilan kelishuv doirasida 90 nafar falastinlik mahbusni ozod qildi. Bu haqda “Reuters” xabar bermoqda.

So‘nggi ma’lumotlarga ko‘ra, oynalari qoraytirilgan ikkita avtobus Iordan daryosining g‘arbiy sohilida joylashgan Ofer harbiy qamoqxonasi hududidan chiqib ketgan. “The Times of Israel” nashrining yozishicha, ozod etilganlarning 78 nafari G‘arbiy Sohildan, 12 nafari esa Sharqiy Quddusdan hisoblanadi. Ular orasida 69 nafar ayol, jumladan, bir nafar voyaga yetmagan, 8 nafar bola va 12 nafar nisbatan kichik jinoyatlar uchun sudlangan erkaklar bor.

Bir necha soat avval esa XAMAS garovga olingan uch nafar isroillik: 24 yoshli Romi Gonen, 28 yoshli Emili Damari va 31 yoshli Doron Shtaynbrexerni ozod qilgan edi. Ular urishayotgan tomonlar o‘rtasidagi kelishuvning birinchi bosqichini amalga oshirish doirasida Xalqaro Qizil Xoch qo‘mitasiga topshirilgan. Ma’lumotlarga ko‘ra, ozod etilgan erkaklar harbiy va xavfsizlik kuzatuvi ostida Isroilga olib ketilgan va ularning ahvolini baholash uchun tibbiy ko‘rikdan o‘tkazish boshlangan.

Eslatib o‘tamiz, Isroil va XAMAS o‘rtasidagi kelishuv shartlariga ko‘ra, birinchi bosqichda 737 nafar falastinlik mahbus ozod qilinadi. Ulardan 296 nafari umrbod qamoq jazosiga hukm qilingan. Shu bilan birga, 236 nafar falastinlik ozod etilganidan so‘ng darhol uchinchi davlatlarga – “Qatar yoki Turkiyaga” yuboriladi.

• Falastin
• Isroil