Isroil Al-Aqso masjidida juma namozini bekor qildi. Bu haqda Al Jazeera xabar berdi. Ushbu qaror Ramazon oyi boshlanganidan beri Isroil tomonidan Islomning uchinchi muqaddas maskaniga qo‘yilgan navbatdagi cheklov hisoblanadi. Fuqarolik ma’muriyati rahbari brigada generali Hisham Ibrohim cheklov Eronning “Isroil va butun mintaqaga” qarshi javob zarbalari sababli qabul qilinganini aytdi. Isroil va uning yaqin ittifoqchisi bo‘lgan AQSh 28-fevral kuni Eronga qarshi harbiy operatsiya boshladi.

“Quddusning Eski shahridagi barcha muqaddas maskanlar — G‘arbiy devor, Ma’bad tog‘i va Muqaddas qabr cherkovi ertaga yopiq bo‘ladi. Barcha din vakillariga ibodat qilish yoki tashrif buyurishiga ruxsat berilmaydi”, dedi Isroilning bosib olingan G‘arbiy sohilni boshqaruvchi organi rahbari.

Hozirgacha Eronning javob raketa zarbalari Isroilda 10 kishining o‘limiga sabab bo‘lgan, Isroil va AQShning Eronga bergan zarbalari esa kamida 1 230 kishining halok bo‘lishiga olib kelgan.

Eronga qarshi urushi boshlanganidan buyon Isroil hukumati Eski shaharga u yerda yashovchilar va do‘kon egalaridan boshqalarning kirishini taqiqlab qo‘ydi. Al-Aqso masjidining katta imomlaridan biri shayx Ikrima Sabri esa Isroilning bu qarorini keskin tanqid qildi. “Bosqinchi hokimiyat Al-Aqsoni yopish uchun har qanday vaziyatdan foydalanmoqda. Bu mutlaqo asossiz”, – dedi u Al Jazeera telekanaliga.

Biroq Isroil tomonidan qo‘yilayotgan cheklovlar urush boshlanishidan oldin ham mavjud edi. Fevral oyida Isroil hukumati musulmonlar uchun muqaddas ramazon oyi arafasida Al-Aqso masjidga kirishni taqiqlagan.

• Eron
• Falastin
• Isroil
• Masjid