Ma’lumotlarga ko‘ra, Isroil parlamenti (Knesset) 1-aprel, dushanba kuni ikkinchi va uchinchi, yakuniy o‘qishda “Al Jazeera qonuni” deb nomlangan, mamlakatda “dushman OAV”ni yopishga ruxsat beruvchi qonunni ma’qulladi. Hujjat aynan ushbu telekanalga qarshi qaratilgan.

71 deputat yoqlab ovoz berdi, 10 nafar deputat qarshi chiqdi. Qonunga ko‘ra, Isroil aloqa vaziri, bosh vazirning roziligi bilan, agar u haqiqatda davlat xavfsizligiga zarar yetkazadigan bo‘lsa, Isroildan va Isroil hududida chet el kanali efirini to‘xtatishga buyruq berishi mumkin. Bundan tashqari, Aloqa vazirligi bunday ommaviy axborot vositalarining ofislarini yopish va uning veb-saytini bloklash haqida buyruq berishi mumkin.

Netanyaxu “Al Jazeera”ni yopishga va’da bergan

Qonun loyihasini faol ravishda ilgari surgan aloqa vaziri Shlomo Kari ovoz berishdan keyin Qatar tomonidan moliyalashtiriladigan “Al Jazeera” telekanalining “yaqin kunlarda” yopilishini va’da qilib, “Isroilda XAMAS karnaylari uchun so‘z erkinligi bo‘lmasligi”ni ta’kidladi, deb yozadi “The Times of Israel”.

“Biz matbuot erkinligidan Isroil va TsAHAL askarlari xavfsizligiga ziyon yetkazish uchun foydalanadigan, urush paytida terrorizmni qo‘zg‘atayotganlarga qarshi samarali va tezkor vosita yaratdik”, - deya Isroil bosh vaziri Benyamin Netanyaxu qonunning qabul qilinishini izohladi. U “Al Jazeera’ni yopish uchun zudlik bilan chora ko‘rish”ga va’da berdi, uning so‘zlariga ko‘ra, telekanal xodimlari “7-oktyabr qirg‘inida faol ishtirok etgan”. Bosh vazir, shuningdek, telekanalni “XAMASning karnayi” deb atadi.

Oq uy, agar “Al Jazeera”ni yopish rejalari haqidagi xabarlar tasdiqlansa, bu “tashvishli fakt” bo‘lishini bildirdi. 

• Binyamin Netanyaxu
• Falastin
• Isroil