Fransiya prezidenti Emmanuel Makron seshanba kuni vazirlar bilan o‘tkazgan haftalik uchrashuvida Isroil Bosh vaziri Binyamin Netanyaxuni ogohlantirdi.

1947-yil noyabrida BMT Bosh Assambleyasida Britaniyaning Falastin mandatini tugatgan va yerni yahudiy va arab davlatlariga bo‘lgan ovoz berish haqida gapirib, “Netanyaxu o‘z mamlakati BMT qarori bilan yaratilganini unutmasligi kerak”, – dedi Makron.

“Demak, hozir BMT qarorlarini buzish vaqti emas”, – deya qo‘shimcha qildi u.

Eslatib o‘tamiz, Isroil BMT tinchlikparvar kuchlari joylashgan Livan janubida Eron tomonidan qo‘llab-quvvatlangan “Hizbulloh” jangari guruhiga qarshi quruqlikdan hujum uyushtirmoqda.

Makronning BMT qarorlarini e’tiborsiz qoldirmaslik chaqirig‘i Livandagi vaziyat va Isroilning BMT tinchlikparvar kuchlarini o‘qqa tutishini nazarda tutgan.

Isroil vakillari esa bunga qarshi bayonot berdi.

“Isroil davlati BMT rezolyutsiyasi natijasida emas, balki mustaqillik uchun urushda erishilgan g‘alaba tufayli, ko‘pchiligi Xolokostni boshdan kechirgan yoki Fransiyadagi Vishi rejimidan qochib qutulgan mard jangchilarning qoni evaziga qozonilgan”, – deyiladi Netanyaxuning matbuot xizmati bayonotida.

• Binyamin Netanyaxu
• Fransiya
• Isroil
• Makron