Istanbulga sayyoh bo‘lib kelgan va hujjatlari bilan pullarini o‘g‘irlatgan 74 yoshli vatandoshimiz O‘zbekistonga qaytarildi. Bu haqda Istanbul Bosh konsulxonasi xabar berdi.

Kecha, 4-oktyabrda Bosh konsulxonaga soat taxminan 20:05 larda 74 yoshli fuqaro K.G. Istanbulda pulsiz va hujjatsiz qiyin ahvolda qolgani sababli O‘zbekistonga qaytishda yordam berishni so‘rab murojaat qilgan.

Ma’lum bo‘lishicha, joriy yilning 27-sentyabr kuni yurtdoshimiz Toshkentdan Istanbulga sayyoh sifatida uchib borgan, va shu yilning 4-oktyabr kuni Turkiyadagi savdo shoxobchalarining birida o‘ziga tegishli bo‘lgan hamyonini o‘g‘irlatib qo‘ygan.

Bosh konsulxona tomonidan murojaatchining yoshi va qo‘lida qaytish chiptasi borligini inobatga olib, zudlik bilan vatanga qaytish guvohnomasi rasmiylashtirib fuqaro aeroportga kuzatib qo‘yilgan.

“O‘z o‘rnida, Turkiyadagi fuqarolarimizdan pasportlari hamda shaxsiy buyumlarini xavfsiz joyda saqlashlari va muhim hujjatlardan nusxa olib qo‘yishlari tavsiya etiladi”, – deyiladi konsulxona xabarida.

• Istanbul
• Sayyoh
• Turkiya