$
12496.80 UZS
11.86
137.81 UZS
2.18
13560.28 UZS
76.54
Kechasi

Jadidlarning milliy davlatchilikka qo‘shgan hissasini o‘rganish dolzarbligicha qolmoqda — Prezident

21:19 / 11.12.2023

Prezident Shavkat Mirziyoyev “Jadidlar: milliy o‘zlik, istiqlol va davlatchilik g‘oyalari” mavzusidagi xalqaro konferensiya ishtirokchilariga tarbik yo‘lladi. Tabrik matni davlat rahbari matbuot xizmati tomonidan eʼlon qilindi.

"Siz, azizlarni o‘tgan asr boshlarida shakllanib, nafaqat Markaziy Osiyo mintaqasi, balki butun musulmon olami va turkiy dunyo tarixida chuqur iz qoldirgan jadidchilik harakatini har tomonlama o‘rganishga bag‘ishlangan xalqaro anjumanning ochilishi bilan chin qalbdan tabriklayman.

Mushtarak tariximizning yorqin sahifalarini tashkil etadigan maʼrifatparvar ajdodlarimizning ibratli faoliyatini, ularning o‘z qimmati va ahamiyatini hamon yo‘qotmasdan kelayotgan boy merosini hamkor davlatlar hamda xalqaro tashkilotlar vakillari, taniqli xorijiy olimlar bilan birgalikda teran tadqiq va targ‘ib etish bizning ustuvor vazifamizdir.

Bugungi anjumanimizga tashrif buyurgan nufuzli xalqaro tashkilotlar rahbarlari va vakillariga, shuningdek, Qozog‘iston, Qirg‘iziston, Tojikiston, Turkmaniston, Ozarbayjon, Turkiya, Rossiya Federatsiyasi, Vengriya, AQSH, Germaniya, Niderlandiya, Shvetsiya, Yaponiya va boshqa mamlakatlardan kelgan taniqli olim va ekspertlarga ushbu anjumanni tashkil etish tashabbusimizni qo‘llab-quvvatlaganliklari uchun samimiy tashakkur bildiraman.

Aziz do‘stlar!

O‘z mohiyat eʼtiboriga ko‘ra noyob ijtimoiy-siyosiy fenomen bo‘lgan jadidchilik g‘oyasining shakllanishi va taraqqiyotiga doir dunyoning bir qator mamlakatlarida ko‘plab tadqiqotlar yaratilgan bo‘lsa-da, ushbu harakat namoyandalarining Markaziy Osiyo hududida milliy davlatchilik va mintaqaviy o‘ziga xoslikni, fuqarolik jamiyatining rivojlanishiga qo‘shgan ulkan hissasini konseptual va tizimli asosda atroflicha o‘rganish dolzarb masala bo‘lib qolmoqda.

Shu nuqtai nazardan qaraganda, taraqqiyparvar ajdodlarimizning ilg‘or g‘oya va qarashlarini tadqiq etish va tizimlashtirish, Turkiston jadidlarining milliy davlatchilik rivojidagi o‘rni va taʼsirini o‘rganish, XX asrning birinchi choragida ular tomonidan barpo etilgan davlat tuzilmalarining qonunchilik bazasini tahlil qilish, dunyoviy, huquqiy va demokratik jamiyat qurishga qaratilgan faoliyatiga tarixiy baho berish, Yangi O‘zbekiston va Uchinchi Renessansni bunyod etishda ushbu merosning mustahkam poydevor bo‘lib xizmat qilishi bilan bog‘liq masalalar bugungi konferensiyaning asosiy muhokama mavzulari etib belgilangani alohida ahamiyatga ega. 

Barchamizga ayonki, “Tilda, fikrda, ishda birlik” degan ezgu g‘oya bilan maydonga chiqqan jadid bobolarimiz xalqlarimizni jaholat va qoloqlikdan olib chiqish, ularni g‘aflat botqog‘idan qutqarishning asosiy yo‘li – bilim va maʼrifatda, dunyoviy taraqqiyotni egallashda, deb bildilar.

Ular shu yo‘lda fidoyilik ko‘rsatib, yangi usul maktablari, teatr va kutubxonalar, nashriyotlar ochdilar. Jamiyat aʼzolarining dunyoqarashi va turmush tarzini o‘zgartirish maqsadida gazeta va jurnallar nashr etdilar. Yoshlarni ilg‘or davlatlarga o‘qishga yubordilar.

Shu bilan birga, davlat boshqaruvi, sud-huquq, moliya, soliq tizimlari, yer masalalarini tadrijiy asosda tubdan isloh qilish uchun g‘oyaviy va amaliy harakatlar olib bordilar. Bir so‘z bilan aytganda, ular milliy uyg‘onish, milliy taraqqiyot g‘oyasini ro‘yobga chiqarish uchun bor kuch va imkoniyatlarini safarbar etdilar.

Afsuski, o‘sha davrdagi mavjud vaziyat, ijtimoiy tuzum bu ulug‘vor maqsadlarni amalga oshirishga yo‘l bermadi.

Bugungi kunda Yangi O‘zbekistonda inson qadri ulug‘lanadigan adolatli, erkin va obod jamiyat, xalqparvar davlat, farovon hayot barpo etishga qaratilgan islohotlarimiz jadid bobolarimizning ezgu g‘oya va dasturlariga har jihatdan uyg‘un va hamohangdir.

Shu bois, xalqimiz ozodligi va Vatanimiz ravnaqi yo‘lida aziz jonlarini fido qilgan ajdodlarimiz xotirasini abadiylashtirish, ularning faoliyati va merosini yangicha tafakkur asosida o‘rganish hamda targ‘ib etishga alohida eʼtibor berilmoqda.

Yurtimizda ushbu yo‘nalishda muhim farmon va qarorlar qabul qilinib, har yili 31 avgust – Qatag‘on qurbonlarini yod etish kuni sifatida keng nishonlanmoqda.

“Shahidlar xotirasi” yodgorlik majmuasi va jamoat fondi, Qatag‘on qurbonlari xotirasi davlat muzeyi, uning Qoraqalpog‘iston Respublikasi va barcha viloyatlarda hududiy bo‘limlari faoliyat olib bormoqda.

Ana shu ishlarimizning mantiqiy davomi sifatida Buxoro shahridagi tarixiy maskanda Jadidchilik tarixi muzeyi tashkil etilmoqda.

Bu murakkab davr tarixiga oid ilmiy va badiiy asarlar, “Tarixning nomaʼlum sahifalari”, “Qatag‘on qurbonlari” nomli ko‘p jildli xotira kitoblari nashr etilmoqda. Badiiy va hujjatli filmlar, ko‘rsatuvlar tayyorlanib, namoyish qilinmoqda. Xalqaro konferensiyalar, ko‘rgazmalar va davra suhbatlari, xotira kechalari, seminarlar muntazam o‘tkazilmoqda.

Atoqli maʼrifatparvarlarimiz davlatimizning yuksak mukofotlari bilan taqdirlanmoqda. Ularning aziz nomlari bilan ataladigan yodgorlik majmualari, taʼlim muassasalari, muzeylar, bog‘ va xiyobonlar barpo etilmoqda.

Keyingi yillarda O‘zbekiston Oliy sudi tomonidan 1030 dan ziyod mustabid tuzum qatag‘oniga uchragan vatandoshlarimiz nomi oqlangani tarixiy adolatni tiklash yo‘lidagi yangi qadam bo‘ldi.

Ayni vaqtda, yurtimizda har yili avgust oyini “Qatag‘on qurbonlarini yod etish oyi” sifatida o‘tkazish, fidoyi vatandoshlarimiz va ularning avlodlari yashagan va yashayotgan xonadonlarga yodgorlik lavhalari o‘rnatish, ularning vorislari hamda yaqin kishilariga hurmat-eʼtibor ko‘rsatish bo‘yicha chora-tadbirlar belgilanmoqda.

Mahalla idoralarida “Qatag‘on qurbonlari xotirasi burchaklari” va “Mahalla xotira kitoblari”ni tashkil etish, har yili kamida 100 nafar qatag‘on qurboni hamda jadid bobolarimiz hayoti va faoliyatini aks ettiradigan to‘plam tayyorlash rejalashtirilgan.

Ushbu muhim mavzuda arxiv hujjatlaridan foydalanish imkoniyatlarini kengaytirish, ilmiy tadqiqot ishlarini amalga oshirish uchun maqsadli grantlar eʼlon qilish, yangi badiiy va publitsistik asarlar yaratish, xorijiy ilm-fan markazlari, fondlar va muzeylar, kutubxonalar bilan hamkorlikni rivojlantirish choralari ko‘rilmoqda.

Buyuk maʼrifatparvar bobolarimiz tomonidan olg‘a surilgan g‘oyaviy-siyosiy, ijtimoiy-maʼrifiy va huquqiy-axloqiy qarashlar, turli millat va elatlar o‘rtasida bag‘rikenglik va hamjihatlik tamoyillarini qaror toptirish bilan birga, milliy manfaatlarni himoya qilishga qaratilgan intilishlar hozirgi murakkab va tahlikali zamonda barchamiz, avvalo, yoshlarimiz uchun chinakam ibrat namunasidir. Ularning hayoti va jasorati bugungi tinch va osoyishta kunlarga osonlik bilan erishilmaganini eslatib, milliy istiqlolimizni, jonajon Vatanimizni ko‘z qorachig‘iday asrashga doimo daʼvat etib turadi.

Fursatdan foydalanib, taniqli tarixchi olim, AQSHdagi Michigan universiteti professori, vatandoshimiz Temur Xo‘ja o‘g‘liga mamlakatimiz tarixi, jumladan, jadidlar merosi bilan bog‘liq noyob hujjatlarni O‘zbekistonga taqdim etayotgani uchun minnatdorlik bildiraman.  

Bugungi nufuzli anjuman har birimizni maʼnaviy uyg‘oqlik va ogohlikka chorlab, qalblarimizda ulug‘ ajdodlarimizga xos azmu shijoat tuyg‘ularini yuksaltirishga, xalqlarimiz va davlatlarimiz o‘rtasida o‘zaro do‘stlik va qardoshlik ruhini, ilmiy-madaniy aloqalarimizni yana-da mustahkamlashga xizmat qiladi, deb ishonaman.

Siz, muhtaram anjuman ishtirokchilariga sihat-salomatlik, yangi ijodiy yutuqlar, konferensiya ishiga esa muvaffaqiyat tilayman", deyiladi tabrik matnida.


O‘zbekiston


														
														O‘zbekistonda 1 mln.dan oshiq talaba bakalavriat yo‘nalishida tahsil olmoqda

O‘zbekistonda 1 mln.dan oshiq talaba bakalavriat yo‘nalishida tahsil olmoqda

Statistika agentligi ma’lumotlariga ko‘ra, 2022/2023-o‘quv yili boshiga ko‘ra, O‘zbekistonda oliy ta’lim tashkilotlarida bak…
16:11 / 02.03.2024

														
														“Xitoy – Qirg‘iziston – O‘zbekiston” temir yo‘l liniyasini qurish uchun qo‘shma korxona tashkil etiladi

“Xitoy – Qirg‘iziston – O‘zbekiston” temir yo‘l liniyasini qurish uchun qo‘shma korxona tashkil etiladi

Joriy yilning 1-mart kuni Xitoy Xalq Respublikasining Qashg‘ar shahrida O‘zbekiston – Xitoy – Qirg‘iziston hukumatlari deleg…
09:30 / 02.03.2024

														
														Urganch va O‘zbekistonning boshqa shaharlariga aviachipta narxini arzonlashtirish uchun 30 mlrd so‘m subsidiya beriladi

Urganch va O‘zbekistonning boshqa shaharlariga aviachipta narxini arzonlashtirish uchun 30 mlrd so‘m subsidiya beriladi

Prezident Urganch aeroporti boshqaruvi va modernizatsiyasiga xususiy sherik jalb qilish muhimligini ta’kidladi.
16:10 / 01.03.2024

														
														Xorazmga kirish uchun “O‘zbekiston – mening ikkinchi uyim” viza tizimi joriy qilinadi – Президент

Xorazmga kirish uchun “O‘zbekiston – mening ikkinchi uyim” viza tizimi joriy qilinadi – Президент

Turizmni qo‘llab-quvvatlash jamg‘armasining tushumi 3 yil davomida Xorazmning o‘zida qoldiriladi.
15:02 / 01.03.2024

														
														Shavkat Mirziyoyev Xorazm viloyatiga 1 mlrd dollar xorijiy investitsiya jalb qilish vazifasini qo‘ydi

Shavkat Mirziyoyev Xorazm viloyatiga 1 mlrd dollar xorijiy investitsiya jalb qilish vazifasini qo‘ydi

Shuningdek, viloyat 600 mln dollarlik eksportni amalga oshirishi lozim bo‘ladi.
13:57 / 01.03.2024

														
														Uzbekistan Airways Navro‘z bayrami munosabati bilan chegirma e’lon qildi

Uzbekistan Airways Navro‘z bayrami munosabati bilan chegirma e’lon qildi

Bu haqda kompaniya matbuot xizmati xabar berdi.
12:40 / 01.03.2024

														
														Samarqand-Toshkent yo‘nalishi bo‘yicha qo‘shimcha “Afrosiyob” poyezdlari qatnovi yo‘lga qo‘yiladi

Samarqand-Toshkent yo‘nalishi bo‘yicha qo‘shimcha “Afrosiyob” poyezdlari qatnovi yo‘lga qo‘yiladi

Ushbu qatnovlar Xalqaro xotin-qizlar kuni munosabati bilan yo‘lovchilarga qulaylik yaratish maqsadida amalga oshiriladi.
12:14 / 01.03.2024

														
														Toshkentda jamoat transportlarida bir kunda qancha yo‘lovchi tashilgani ma’lum bo‘ldi

Toshkentda jamoat transportlarida bir kunda qancha yo‘lovchi tashilgani ma’lum bo‘ldi

Ko‘rsatkich o‘tgan yilga nisbatan 160 foizga o‘sgan.
11:06 / 01.03.2024

														
														O‘zbekistonning oltita viloyatida qor ko‘chish xavfi e’lon qilindi

O‘zbekistonning oltita viloyatida qor ko‘chish xavfi e’lon qilindi

Bu asosan tog‘li hududlarda sodir bo‘ladi.
10:36 / 01.03.2024

														
														Tuproqqal’a tumanida 100 megavattlik quyosh elektr stansiyasi qurilishi boshlandi

Tuproqqal’a tumanida 100 megavattlik quyosh elektr stansiyasi qurilishi boshlandi

Prezident Shavkat Mirziyoyevning Xorazm viloyatiga tashrifi chog‘ida 29-fevral kuni “Voltalia” kompaniyasi tomonidan quvvati…
08:26 / 01.03.2024

Bu ham qiziq

Tuproqqal’a tumanida 100 megavattlik quyosh elektr stansiyasi qurilishi boshlandi

Tuproqqal’a tumanida 100 megavattlik quyosh elektr stansiyasi qurilishi boshlandi

Prezident Shavkat Mirziyoyevning Xorazm viloyatiga tashrifi chog‘ida 29-fevral kuni “Voltalia” kompaniyasi tomonidan quvvati…
08:26 / 01.03.2024
Samarqand-Toshkent yo‘nalishi bo‘yicha qo‘shimcha “Afrosiyob” poyezdlari qatnovi yo‘lga qo‘yiladi

Samarqand-Toshkent yo‘nalishi bo‘yicha qo‘shimcha “Afrosiyob” poyezdlari qatnovi yo‘lga qo‘yiladi

Ushbu qatnovlar Xalqaro xotin-qizlar kuni munosabati bilan yo‘lovchilarga qulaylik yaratish maqsadida amalga oshiriladi.
12:14 / 01.03.2024
Stressdan tez chiqib ketsa bo‘ladimi?

Stressdan tez chiqib ketsa bo‘ladimi?

Stressdan tez chiqib ketish uchun tavsiyalar.
13:23 / 02.03.2024
Rolls-Royce’dan yangi avtomobil taqdimoti

Rolls-Royce’dan yangi avtomobil taqdimoti

Arcadia Droptail avtomobilining taxminiy narxi 30 mln dollarni tashkil qiladi.
11:20 / 02.03.2024
O'zbekistonda bahorning ilk kunida qanday ob-havo kuzatiladi?

O'zbekistonda bahorning ilk kunida qanday ob-havo kuzatiladi?

Respublika Gidrometeorologiya xizmati agentligining xabar berishicha, 1-mart kuni Toshkentda havo bulutli bo‘ladi, biroz yog…
08:16 / 01.03.2024
O‘zbekistonning oltita viloyatida qor ko‘chish xavfi e’lon qilindi

O‘zbekistonning oltita viloyatida qor ko‘chish xavfi e’lon qilindi

Bu asosan tog‘li hududlarda sodir bo‘ladi.
10:36 / 01.03.2024
Xitoyliklar uch g‘ildirakda yura oladigan avtomobilni taqdim etdi

Xitoyliklar uch g‘ildirakda yura oladigan avtomobilni taqdim etdi

BYD kompaniyasi uch g‘ildirakda yura oladigan, raqsga tushuvchi YangVang U9 sportkarini sotuvga chiqardi.
11:12 / 02.03.2024
BMTdagi ovoz berishda birgina davlat Isroil tarafini oldi

BMTdagi ovoz berishda birgina davlat Isroil tarafini oldi

Birgina AQSh yana bir marta Isroilni himoya qilgan holda hujjatga veto qo‘ygan.
14:57 / 02.03.2024
Erdo‘g‘an Moskvada Bashar Asad bilan uchrashishi mumkin

Erdo‘g‘an Moskvada Bashar Asad bilan uchrashishi mumkin

Moskvada Turkiya va Suriya prezidentlari Rajap Toyyib Erdo‘g‘an va Bashar Asadning uchrashuvini o‘tkazish rejalari Anqaraga …
13:16 / 02.03.2024
Dmitriy Mendeleyev elementlar davriy sistemasini tuzgan kun

Dmitriy Mendeleyev elementlar davriy sistemasini tuzgan kun

Mendeleyevning davriy qonunni kashf etishi 19-asr kimyo tarixidagi yirik voqealardan biri.
09:26 / 01.03.2024

O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!

O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!