AQShning “Eurasianet” internet nashrida “Donald Tramp Markaziy Osiyoga tashrif buyurgan birinchi AQSh Prezidenti bo‘la oladimi?” sarlavhali maqola e’lon qilindi. Maqolada O‘zbekiston Prezidentining AQSh yetakchisi bilan joriy yil 5-sentyabrda o‘tkazgan telefon orqali muloqoti va Trampning Markaziy Osiyo mamlakatlariga tashrif buyurish rejalari haqida so‘z borada. “Telefon orqali muloqot chog‘ida O‘zbekiston Prezidenti Shavkat Mirziyoyev bu g‘oyani ilgari surdi” – deyilgan materialda.

Muallifga ko‘ra, AQSh rahbari Markaziy Osiyoga tashrif buyuradimi yoki yo‘q, hozircha noma’lum. O‘zbekiston tomoni tarqatgan rasmiy bayonotga ko‘ra, 5-sentyabr kuni bo‘lib o‘tgan telefon orqali muloqot chog‘ida Shavkat Mirziyoyev AQSh yetakchisini “qulay vaqtda” O‘zbekistonga tashrif buyurishni taklif qildi. AQShning O‘zbekistondagi elchisi o‘zbek jurnalistlariga taklif “ijobiy qabul qilinganini” aytdi.

“Vashingtondagi manbalarning ma’lum qilishicha, 9-sentyabr holatiga ko‘ra, Markaziy Osiyoga tashrif bo‘yicha hech qanday qaror qabul qilinmagan. O‘zbekiston Trampning ikkinchi Prezidentlik muddatida Oq uy bilan muloqot qilishda eng faol Markaziy Osiyo davlati bo‘lmoqda” – deyiladi materialda.

Nashrda ma’lum qilinganidek, shu yil aprel oyida O‘zbekiston tashqi ishlar vaziri boshchiligidagi delegatsiya Oq uyda bo‘ldi. O‘zbekiston, shuningdek, AQShdan muhojirlarni deportatsiya qilish uchun bir necha charter reyslarini tashkil qildi.

“Aprel oyida O‘zbekiston delegatsiyasi Amerika kompaniyalari bilan konchilik bo‘yicha bir qancha shartnomalar imzoladi. Ikki mamlakat yetakchilari o‘rtasida kechgan telefon muloqotida ham muhim foydali qazilmalar va iqtisodiy hamkorlikning boshqa sohalari muhokama qilindi” – deya aytilgan manbada.

Muallif, shuningdek, O‘zbekiston yetakchisi Shavkat Mirziyoyev 2018-yilda Oq uyga rasmiy tashrif bilan kelganini va O‘zbekiston rahbari munosib kutib olingani haqida yozgan.

• Shavkat Mirziyoyev
• Tashrif
• Tramp
• muloqot