Jahon banki O‘zbekistonga irrigatsiya va drenaj infratuzilmasini modernizatsiya qilish loyihasini amalga oshirish uchun imtiyozli kredit ajratadi. Bu haqda moliya tashkiloti saytida xabar berildi.

Bundan ko‘zlangan maqsad sug‘orish jarayonida suv yo‘qotilishini kamaytirish, irrigatsiya tizimlarining energiya samaradorligini oshirish va fermerlarga xizmat ko‘rsatish sifatini oshirishdan iborat. Loyiha Jahon bankining Markaziy Osiyoda suvdan foydalanish samaradorligini oshirish va suvni tejash bo‘yicha mintaqaviy dasturining bir qismidir.

Kredit miqdori 200 million dollarni tashkil etadi. Loyiha doirasida Qoraqalpog‘iston, Buxoro, Qashqadaryo, Surxondaryo va Namangan viloyatlaridagi Sirdaryo va Amudaryodan olib o‘tadigan umumiy uzunligi 259 kilometr bo‘lgan 8 ta magistral kanal betonlanadi. Ish davomida geomembranlar va zamonaviy suv tejovchi materiallar qo‘llaniladi.

Shuningdek, loyiha suv taqsimotini nazorat qilish uchun 470 ta gidrotexnika inshootini qurishni ham o‘z ichiga oladi.

Suv yo‘llarida sozlanishi mumkin bo‘lgan suv chiqarish va hisobga olish moslamalari o‘rnatiladi. Suv ta’minotini boshqarish uchun nazorat va ma’lumotlarni yig‘ish tizimlari joriy etiladi.

“Rejalashtirilgan tadbirlar qishloq xo‘jaligi mahsuldorligini oshirish, suvdan foydalanuvchilarning farovonligini oshirish, shuningdek, irrigatsiya va agrosanoat tarmoqlarida yangi ish o‘rinlarini yaratishga xizmat qiladi”, – deydi Jahon bankining Markaziy Osiyodagi vakolatxonasi rahbari Tatyana Proskuryakova.

• Jahon banki
• Kredit
• O‘zbekiston