Korrupsiyaga qarshi kurashish agentligi tomonidan oʻtkazilgan monitoring natijasida “AVTOMAGISTRAL” unitar korxonasi buyurtmachiligida transport xizmatini koʻrsatish uchun 2023-yil 25-mart kuni oʻtkazilgan jami 1 mlrd 570,0 mln soʻmlik davlat xaridida Oʻzbekiston Respublikasi “Davlat xaridlari toʻgʻrisida”gi Qonunga zid ekanligi aniqlangan .

Xususan, xarid komissiyasi tomonidan 515,0 mln soʻmlik davlat xaridida ishtirok etgan talabgor va gʻolib deb topilgan “I.A.M.”

MChJ taʼsischisi B.M.I ayni paytda “AVTOMAGISTRAL” UK xarid komissiyasi aʼzosi va korxona bosh muhandisi ekanligi eʼtiborga olinmagan va nohalol raqobatni keltirib chiqarganligi oʻrganilmagan, shuningdek, mazkur holat boʻyicha tanlovni oʻtkazishni vaqtinchalik bekor qilish chorasi koʻrilmagan.

Bundan tashqari, har ikki davlat xaridida ham xarid komissiyasi kotibi tomonidan foydalangan kompyuterning IP-manzili orqali xaridda ishtirok etgan tadbirkorlarning hujjatlari maxsus elektron platformaga yuklangan.

Mazkur holatlar boʻyicha xarid komissiyasining bayonnomasini bekor qilish toʻgʻrisida buyurtmachiga taqdimnoma kiritilgan va chora koʻrish uchun toʻplangan hujjatlar Bosh prokuraturaga yuborilgan hamda holat boʻyicha xizmat tekshiruvi oʻtkazish uchun Oʻzbekiston Respublikasi Avtomobil yoʻllari qoʻmitasiga soʻrovnoma kiritilgan.

“AVTOMAGISTRAL” UK tomonidan 2023-yil 29-mart kuni Agentlikka taqdim etilgan xatga koʻra, Agentlikning taqdimnomasida qayd etilgan kamchiliklar bartaraf etilib, xarid komissiyasining 2 ta lot boʻyicha bayonnomasi bekor qilingan.

• Bosh prokuratura
• Korrupsiya