Joriy yil 27-dekabr kuni Seul shahrida O‘zbekiston FVVga 8 dona maxsus yong‘inga qarshi avtomobil va tibbiy jihozlar, shuningdek, himoya vositalari va jihozlarini topshirish marosimi bo‘lib o‘tdi.

Marosimda O‘zbekistonning Seuldagi elchixonasi, Koreya Respublikasi Milliy yong‘in xavfsizligi xizmati, Koreya-O‘zbekiston biznes uyushmasi va Koreya yong‘in xavfsizligi assotsiatsiyasi vakillari ishtirok etgan.

Mazkur uskunalar O‘zbekistonga 2022-yilning boshida yetkazib beriladi.

Shuningdek, Janubiy Koreya tomoni O‘zbekiston hamda Janubiy Koreyada ushbu uskunalardan foydalanish bo‘yicha o‘quv kurslarini tashkil etishni rejalashtirmoqda.

Tadbir davomida O‘zbekiston FVV Yong‘in xavfsizligi va favqulodda vaziyatlar ilmiy-tadqiqot instituti bilan Koreya yong‘in xavfsizligi instituti o‘rtasida hamkorlik memorandumi ham imzolangan va muntazam tajriba almashish maqsadida idoralararo hamkorlikning bevosita aloqalarini yo‘lga qo‘yish bo‘yicha kelishuvga erishilgan.

Ayni paytda Janubiy Koreya tomoni bilan Toshkent viloyatida yong‘in xavfsizligi bo‘yicha o‘quv majmuasini qurish bo‘yicha investisiya loyihasini amalga oshirish masalasi ishlab chiqilmoqda.

Bundan tashqari, kadrlarni tayyorlash va qayta tayyorlash, jumladan, O‘zbekiston FVV mutaxassislarini Janubiy Koreyadagi yong‘inga qarshi tayyorgarlik bo‘yicha ta’lim muassasalarida tayyorlash sohasida hamkorlikni faollashtirish rejalashtirilgan.

• Koreya
• O‘zbekiston