Jizzax viloyati Gʻallaorol tumanida O‘zbekiston hududida uchramaydigan piton iloni topildi. Bu haqida “Ekologuz” Telegram kanalida ma’lum qilindi.

Qayd etilishicha, joriy yil 22-mart kuni “Gʻallaorol tumani Juma bozori tarafda 3 metrli ilon chiqdi” sarlavhasi ostida ijtimoiy tarmoqlarda xabarlar tarqalgan.

Viloyat Ekologiya va atrof-muhitni muhofaza qilish boshqarmasi matbuot xizmati kotibining ma’lumot berishicha, bunday tur ilonlar O‘zbekiston hududida uchramaydi.

Ma’lum qilinishicha, video va suratlardagi piton iloni Gʻallaorol tumani Olimlar MFY hududidagi ochiq maydonga sel bilan oqib kelgan va cho‘ponlar tomonidan topilgan. Tarqalgan xabarlar yuzasidan Gʻallaorol tumani Ekologiya bo‘limi Ichki ishlar boshqarmasi bilan birgalikda tekshiruv ishlari o‘tkazmoqda.

“Ilon qayerda va kim tomonidan suvga tashlangani haqidagi to‘liq ma’lumotlar olinishi bilan yana qo‘shimcha xabar beriladi”, – deyiladi xabarda. 

• Ekologiya
• Jizzax
• ilon