Avval xabar qilinganidek, AOKA va Jizzax viloyati hokimligi tomonidan Respublika va mahalliy OAV vakillari uchun viloyat boʻylab press-tur tashkil etildi. Tur doirasida, Jizzax shahridagi “Sambhram” texnologiya universitetiga tashrif amalga oshirildi.

Hukumatning tegishli qarorig00a muvofiq tashkil etilgan “Sambhram” universiteti (Hindiston) nodavlat oliy taʼlim tashkiloti hisoblanib, u yerda oʻqitish kunduzgi taʼlim shaklida, ingliz tilida hamda toʻlov-kontrakt asosida amalga oshiriladi.

Qayd etilishicha, universitetda 2021-2022 oʻquv yilida 2 000 ga yaqin talaba qabul qilingan boʻlib, taʼlim muddati 4 yil boʻlgan (kunduzgi) 3 ta bakalavr yoʻnalish va taʼlim muddati 2 yil boʻlgan 2 ta magistratura mutaxassisliklari boʻyicha hujjatlar qabul qilingan. Bular:

Bakalavriat: 1.Axborot texnologiyalari muhandis-dasturchisi (B.Tech.IT)-700 nafar, 2. Axborot texnologiyalari fanlari (B.Sci.IT)-500 nafar, 3. Biznes boshqaruvi (ВВА.IT)-700 nafar.

Magistratura: 1. Axborot texnologiyalari fanlari (М.Sc.IT)-50 nafar, 2. Biznes boshqaruvi (МВА.IT)-50 nafar.

Maʼlum qilinishicha, universitet bitiruvchilariga Oʻzbekiston va Hindistonda oliy taʼlim toʻgʻrisidagi hujjat sifatida tan olinadigan diplom beriladi.

Keltirilishicha, bugungi kunda universitetda 200 oʻrinli oshxona binosi hamda 500 oʻrinli yotoqxonalarning taʼmirlanishi boʻyicha ishlar olib borilmoqda.

Hozirgi kunda 1 500 nafardan ortiq talabalar 2 smenada dars mashgʻulotlarida ishtirok etayotgan universitet faoliyatiga Hindistondan 16 nafar, Oʻzbekistondan 30 nafar professor-oʻqituvchilar jalb etilgan. Umumiy ilmiy salohiyat 30% ni tashkil etadi.

Shuningdek, media tur ishtirokchilari shahar markazida joylashgan “Prezident maktabi”da ham boʻlishdi.

Davlat rahbarining tegishli qarori bilan tashkil etilgan “Prezident maktabi”ning 144 nafar oʻquvchisi viloyat maktablaridagi 260 ming nafarga yaqin oʻgʻil-qizlar orasidan eng sarasi, bilimdoni, iqtidorlisi sifatida bu yer oʻqishadi.

Qisqa fursat ichida 70,7 mlrd.soʻm byudjet mablagʻlari evaziga bunyod etilgan mazkur muassasada oʻquvchilar uchun 120 oʻrinli oshxonada barcha sharoitlar yaratilgan. 50 oʻrinli maktab kutubxonasida 9 500 dan ziyod kitob va qoʻllanmalardan iborat fond mavjud.

Oʻz navbatida, maktabdagi oʻquv-tarbiya jarayonlari xalqaro Cambridge Assessment International Education taʼlim sistemasi va mahalliy taʼlim tizim integratsiyalashgan holda tashkil etilgan.

Bundan tashqari, oʻquvchilarning iqtidori, aniq fanlar va texnologiyalarga qiziqishi, yaratuvchanlik salohiyatini oʻstirishga xizmat qiladigan robototexnika, modellashtirish, kreativ ijod toʻgaraklari, fizika, kimyo, biologiya kabi tabiiy fanlarni chuqurlashtirilgan holda oʻzlashtirish imkonini beradigan laboratoriya xonalari tashkil etilgan.

Qayd etilishicha, maktabda Fillipindan 3 nafar, Hindistondan 2 nafar, Xorvatiya, Pokiston,Buyuk Britaniya va Shotlandiyadan 1 nafardan jami 9 nafar xorijlik malakali oʻqituvchi yoshlarga taʼlim berishadi.

• Jizzax
• Maktab
• Media-tur