Mahallabay ishlash va tadbirkorlikni rivojlantirish agentligi matbuot xizmati ma’lumotlariga ko‘ra, hokim yordamchilari tomonidan 2022-yil yanvar oyidan oktyabr oyiga qadar hududlarda band bo‘lmagan aholini ish bilan ta’minlash va tadbirkorlikka jalb qilish orqali 2,4 million nafar fuqaroning daromadli mehnat bilan bandligi ta’minlangan.

Qayd etilishicha, 903 ming nafar fuqaro doimiy ish joylariga joylashtirilgan. 914 ming nafar fuqaro o‘zini o‘zi band qilgan shaxs sifatida ro‘yxatga olingan. 82 ming nafar fuqaro yakka tartibdagi tadbirkorlikka (yollanma ishchilari bilan birgalikda) va 158 ming nafari haq to‘lanadigan jamoat ishlariga jalb qilingan. 392 ming nafar fuqaroga ijara asosida yer ajratilgan.

Shuningdek, hokim yordamchilari tavsiyanomalari asosida 347 mingta loyihaga 8,1 trillion so‘m imtiyozli kreditlar va 46 mingdan ortiq ishsizlarga 152,5 milliard so‘m subsidiyalar ajratilgan. Bundan tashqari, hokim yordamchilari tomonidan 274 ming nafar aholi kasb-hunar va tadbirkorlikka o‘qitish uchun yo‘naltirilib, ularning 223 ming nafari o‘qishni tamomladi. Hokim yordamchilari tomonidan shakllantirilgan 46 mingdan ortiq “mahallabay” mikroloyihalarning 35 mingtasi ishga tushirilib, 175 mingga yaqin ish o‘rinlari yaratilgan.

“Bunda, 1 ming 800 ta loyiha ko‘p qavatli uy-joylar yerto‘lasini ijaraga berish orqali, 2 ming 940 tasi mahalladagi bo‘sh turgan ob’yektlardan samarali foydalanish hisobiga amalga oshirilgan. Mahallalarda amalga oshirilgan ishlar natijasida 77 mingta yuridik va 76 mingta yakka tartibdagi tadbirkorlik sub’yektlari davlat ro‘yxatidan o‘tkazildi, shuningdek 6,3 mingga yaqin korxonalarning faoliyati kengaytirildi va kam quvvat bilan ishlayotgan 9,7 mingta korxonalarning quvvatlari tiklandi”, – deyiladi xabarda.

Mahallabay ishlash va tadbirkorlikni rivojlantirish agentligi direktorining birinchi o‘rinbosari Muxtor Shonazarov ma’lumotlariga ko‘ra, bugungi kunda mamlakatimizda 9 ming 294 nafar hokim yordamchisi faoliyat olib bormoqda.

Hokim yordamchilariga esa ishlash imkoniyati va xohishi bor, lekin sharoiti og‘ir oilalarni o‘qitish va o‘z ishini boshlashi uchun imtiyozli kredit, subsidiya yoki dehqon xo‘jaligi uchun ularga yer maydonlari ajratish masalalari bilan shug‘ullanish vazifalari topshirilgan.

Davlat statistika qo‘mitasi ma’lumotlariga ko‘ra, 2022 yilning yanvar-sentyabr oylarida O‘zbekistonda ishsizlar soni 1,3 mln kishini tashkil etgan.

Iqtisodchi Otabek Bakirov telegramdagi o‘zining “Bakiroo” kanalida ushbu miqdor oshirib ko‘rsatilganini ta’kidlagan.

“Mahallabay ishlash va tadbirkorlikni rivojlantirish agentligi matbuot xizmati ma’lumotlariga ko‘ra, hokim yordamchilari tomonidan 2022-yil yanvar oyidan oktyabr oyiga qadar hududlarda band bo‘lmagan aholini ish bilan ta’minlash va tadbirkorlikka jalb qilish orqali 2,4 million nafar fuqaroning daromadli mehnat bilan bandligi ta’minlangan.

Hatto o‘zbek statistikasi kamtarona, hatto o‘tgan epoxada yolg‘on bunchalik katta shishirilmagan.

Rasmiy statistikaga ko‘ra, o‘tgan 9 oyda ish bilan band aholi soni 297 mingga oshgan. Mahallabay agentligi hatto rasmiiy statistikani 8 barobardan ko‘proqqa shishirgan”, – deyiladi postda.

• Mahalla
• ishsizlik
• statistika