Joriy yilning dastlabki uch oyida 106 mingdan ortiq xorijlik Rossiya fuqaroligini oldi, bu o‘tgan yilga nisbatan 35 ming kishiga kam. Rossiya Ichki ishlar vazirligining 2023-yilning yanvaridan martigacha bo‘lgan davrdagi migratsiya holati bo‘yicha statistik ma’lumotlariga ko‘ra, ko‘pincha Tojikiston fuqarolari Rossiya fuqaroligini qabul qilgan.

“2023-yilning yanvar-mart oylarida Rossiya fuqaroligini olish to‘g‘risida qaror qabul qilgan shaxslar soni 106 320 nafarni tashkil etadi”, – deyiladi hujjatda. Shu bilan birga, o‘tgan yilning shu davrida 141 663 nafar xorijlik Rossiya fuqaroligini olgan.

Ichki ishlar vazirligi ma’lumotlariga ko‘ra, 2023-yilning uch oyida Tojikiston fuqarolari tomonidan Rossiya fuqaroligini olish bo‘yicha 44,9 mingta qaror qabul qilingan. Bu belgilangan davr uchun eng yuqori ko‘rsatkich hisoblanadi. Ikkinchi va uchinchi o‘rinni Ukraina (22 ming) va Armaniston (8,9 ming) fuqarolari band etgan. Shuningdek, Qozog‘iston (6,9 ming), Qirg‘iziston (5,4 ming), O‘zbekiston (4,7 ming), Ozarbayjon (3,7 ming), Moldova (3,1 ming), Belarus (2,4 ming) va Turkmaniston (912 kishi) fuqarolari ham Rossiya Federatsiyasi pasportini olgan.

• O‘zbekiston
• Pasport
• Rossiya