Hududlardagi ichki audit va moliyaviy nazorat xizmatlari tomonidan 205 ta taʼlim muassasasida oʻtkazilgan moliyaviy nazorat va profilaktik tadbirlar davomida 11,5 mlrd. soʻmdan ziyod moliyaviy xato va kamchiliklar aniqlangan. Bu haqda Korrupsiyaga qarshi kurashish agentligi xabar berdi.

Qayd etilishicha 2019-yilda oliy taʼlim sohasida 142 ta jinoyat sodir etilgan boʻlsa, 2020-yilda bu koʻrsatkich 39 foizga (87 ta) yoki jinoyat sodir etgan shaxslar soni 35 foizga kamaygan. 2021-yilning 6 oyida bu koʻrsatkich 16 tani tashkil etib, unda ishtirok etganlar 26 nafardan iborat boʻlgan.

Oliy va oʻrta maxsus taʼlim muassasalarida 2019-yilda aniqlangan moliyaviy qonunbuzarliklar qariyb 20 mlrd. soʻmni tashkil etgan boʻlsa, bu koʻrsatkich 2020-yilda 66 foizga kamaygan. 2021-yilning oʻtgan davrida bu koʻrsatkich 5,2 mlrd. soʻmni tashkil etgan.

2019-2021-yillarda oʻtkazilgan profilaktik tadbirlarda 793 ta taʼlim muassasalarida 17,9 mlrd. soʻmlik byudjet mablagʻlarining noqonuniy sarflanishining oldi olingan. 

Keltirilishicha, hududlardagi ichki audit va moliyaviy nazorat xizmatlari tomonidan 2021-yilning 1-yarmida 205 ta taʼlim muassasasida moliyaviy nazorat va profilaktik tadbirlar oʻtkazilgan.

Ularda 11,5 mlrd. soʻmdan ziyod moliyaviy  xato va kamchiliklar aniqlangan. Shundan 4 mlrd. soʻmga yaqin mablagʻlarning qaytarilishi taʼminlangan. Yaʼni, qariyb 5 mlrd. soʻmlik moliyaviy xato va kamchiliklarning oldi olingan.

Moliyaviy xatoliklarga yoʻl qoʻygan 139 nafar xodimga nisbatan intizomiy jazo qoʻllanilgan. Shundan, 99 nafar xodimga hayfsan berilgan, 3 nafar xodimga nisbatan jarima qoʻllanilgan, 37 nafar xodim esa  egallab turgan lavozimidan ozod etilgan.

Bundan tashqari, Korrupsiyaga qarshi kurashish agentligi tomonidan ayrim oliy taʼlim muassasalarida korrupsiyani keltirib chiqarayotgan omillar, unga sabab boʻlayotgan shart-sharoitlar, byudjet va byudjetdan tashqari mablagʻlardan foydalanish, ish haqi, stipendiya va boshqa toʻlovlarning toʻlanishi hamda davlat xaridlarini amalga oshirishda qonunchilikka rioya etilishi oʻrganilganida, qator qonunchilik talablari buzilganligi aniqlangan.

Masalan, Buxoro davlat universitetida 348 mln. soʻmlik moddiy boyliklar qimmat narxlarda xarid qilingan, 222 mln. soʻmdan ziyod mablagʻlar esa maqsadsiz sarflangan. 246 mln. soʻmdan ortiq shartnomada koʻrsatilmagan jihozlar sotib olingan. 

Qurilish tanlovlarini oʻtkazishda 20 mlrd. soʻmlik tanlovlarda davlat xaridlariga oid qonun talablariga rioya etilmagan. Buxoro muhandislik-texnologiya institutida magistrantlarga 13.5 mln. soʻmdan ortiq stipendiya ortiqcha toʻlangan. Toshkent davlat iqtisodiyot universiteti esa tomonidan oʻtkazilgan 1,1 mlrd. soʻmlik tanlovlarda davlat xaridlariga oid qonunchilik talablari buzilgan.

Shuningdek, Buxoro davlat tibbiyot institutida 137 mln. soʻmga yaqin stipendiya, ish haqi va boshqa toʻlovlar noqonuniy toʻlangan hamda xodimlarni ragʻbatlantirishda ijtimoiy adolat va tenglik prinsiplari buzilgan. Ushbu taʼlim muassasasida, xodimlarni moddiy ragʻbatlantirishda ham adolat tamoyillari buzilganligi aniqlangan.

Innovatsiya sohasiga aloqasi boʻlmagan texnik xodim innovatsiya sohasi boʻyicha ragʻbatlantirilgan. Shuningdek, institut akademik litsey binosini taʼmirlash boʻyicha berilgan 27 564 865, 000 soʻmlik eʼlon oʻrganilganida, qurilish ishlari aslida bajarib boʻlinganligi maʼlum boʻlgan.

Maʼlum qilinishicha, yuqoridagi holatlar boʻyicha oliy taʼlim muassasalariga korrupsiyani keltirib chiqaruvchi sabab va shart-sharoitlarni bartaraf etish choralarini koʻrish toʻgʻrisida taqdimnomalar kiritilgan. Toʻplangan hujjatlar prokuratura idoralariga qonuniy qaror qabul qilish uchun yuborilgan.

• Agentlik
• Aksilkorrupsiya