Shavkat Mirziyoyev raisligidagi yig‘ilishda O‘zbekistonda tolani qayta ishlash quvvatlari 1 million 300 ming tonnaga yetgani, lekin 1 million tonna tola ishlab chiqarilayotgani ta’kidlandi.

Ya’ni, hozirning o‘zida 300 ming tonna tola yetmayapti. Kelgusi besh yilda bu ehtiyoj yana 600 ming tonnaga oshadi. Shundan 300 ming tonnasi sun’iy tola bo‘lsa, yana kamida 300 ming tonna paxta tolasi zarur.

“Nima uchun Turkiyaning paxta maydoni bizdan 2 karra kam bo‘lsada, tolani deyarli teng hajmda ishlab chiqaradi? Buning asosiy sababi – hali ilmga, zamonaviy texnologiyalarga joylardagi rahbarlarning e’tibori va mas’uliyati past”, deydi Prezident.

Shuningdek, davlat rahbari qayta ishlash borasidagi ishlar ahvoliga to‘xtalgan.

Qayd etilishicha, ip-kalavani tayyor mahsulotgacha qayta ishlash darajasi mamlakatda 23 foizni tashkil etadi.

Ta’kidlanishicha, buning oqibatida yiliga 9 milliard dollar daromad boy berilmoqda.

Yig‘ilishda agar mutasaddilar tuman hokimlari va klasterlar bilan ishlarni to‘g‘ri tashkil qilsa, to‘qimachilikdagi ish o‘rinlarini hozirgi 400 mingdan bemalol 1 millionga ko‘paytirish imkoniyati borligi ko‘rsatib o‘tilgan.

• Paxta
• Prezident
• Shavkat Mirziyoyev
• Videoselektor