Kelgusi yildan jurnalistika bo‘yicha bakalavriat bosqichi 3 yil qilib belgilanishi mumkin. Bu haqda O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘ja ma’lum qildi. 

Rektor bu borada tegishli vazirlikka taklif kiritilganini ham ta’kidladi.

–  Kelgusi yildan jurnalistika sohasida bakalavriat bosqichini 3 yil, magistratura bosqichini esa 1,5 yil etib belgilashni rejalashtirayapmiz. 4 yil juda ko‘p. Xudo iqtidor bergan bo‘lsa, 3 yil ham yetadi, xalqaro tajriba ham shuni ko‘rsatayapti. 
Shuningdek, o‘quv dasturlarimizga ham qo‘shimchalar kiritib boramiz: psixologiya, sosiologiya fanlarini qo‘shamiz, – dedi Sherzodxon Qudratxo‘ja Milliy matbuot markazida bo‘lib o‘tgan seminarda.

Sherzodxon Qudratxo‘ja shu bilan birga, sohani sifatli kadrlar bilan boyitish haqida gapirib, jurnalistlarni birlashishga hamda boshqa OTMlarda ham jurnalistika kafedralarini tashkil etishni targ‘ib qilishga chaqirdi.

• Jurnalistika
• OTM