Kanada mudofaa vaziri Anita Anand 18-mart, shanba kuni Ukrainaga navbatdagi harbiy yordam partiyasi yuborilganini ma’lum qildi. Bu haqda siyosatchi “Twitter” sahifasi orqali xabar berdi.

“Kanadaning ko‘proq harbiy yordami Ukrainaga yo‘l oldi. Biz Ukrainani qancha vaqt kerak bo‘lsa, shuncha qo‘llab-quvvatlaymiz", – deya yozgan Anand.

Shuningdek, u Ukrainaning “An-124 Ruslan” yuk samolyotiga zirhli qutqaruv mashinalari yuklangani aks etgan videoni ham joylashtirgan.

Avvalroq Kanada Ukrainaga “Leopard 2” partiyasini jo‘natgan edi. Bungacha Anita Anand Ukrainaga yangi harbiy yordam paketi taqdim etilishini e’lon qilgan edi.

Qayd etilishicha, Kanada Ukrainaga havo hujumidan mudofaa tizimlarini qo‘llab-quvvatlash uchun 8000 ga yaqin 155 millimetrli o‘q-dorilar, shuningdek, Kanada Qurolli kuchlari o‘z zaxiralaridan 12 ta zenit-raketalarni taqdim etadi.