Ma’lum bo‘lishicha, Qozog‘istonda messenjerlarning mahalliy analoglarini ishlab chiqish boshlangan. Bu haqda Raqamli rivojlanish, innovatsiyalar va aerokosmik sanoat vaziri Jaslan Madiyev xabar bergan.

Vazirdan WhatsApp va Telegram’ning mahalliy analogi ishlab chiqilishi ehtimoli so‘ralganda:
“Sizni ishontirib aytamanki, bugungi kunda startaplar hamjamiyati shu kabi loyihalar ustida ishlamoqda. Ularni kuzatib, qo‘llab-quvvatlamoqdamiz. Ertami-kechmi, bunga guvoh bo‘lamiz, deb o‘ylayman.

Muddatlarni aytmayman, chunki ertaga — shu sanaga qadar shu startapga va’da bergan edingiz, deysiz. Lekin bu bozor. Bilasizmi, WhatsApp va Telegram dastlabki ishga tushirilgan paytlar ular zararga ishlagan, bu juda katta pul edi. Hattoki, hozir ham bu ular uchun foydali biznesligi haqida ishonch bilan ayta olmayman”, - degan u.

Shuningdek, vazir WhatsApp’da pul ishlash uchun hech qanday reklama yo‘qligi, Messenjer esa boshqa mahsulotlar tomonidan subsidiyalanishi haqida gapirgan.

Qolaversa, messenjer yaratish zararga kiruvchi faoliyatligi, loyiha dasturchilari bundan foyda olish yo‘llarini topishiga umid bog‘lashini ma’lum qilgan.

• Innovatsiya
• Qozog‘iston