AOKA tomonidan respublikada faoliyat yuritayotgan OAV uchun Fargʻona viloyatiga media-tur tashkil etildi. 

Oʻzbekiston Respublikasi Prezidenti Shavkat MIrziyoyev raisligida aholini uy joy bilan taʼminlash hamda yashil maydonlarni kengaytirish choratadbirlari muhokamasi yuzasidan oʻtkazilgan videoselektor yigʻilishda berilgan topshiriqdan kelib chiqib, AOKA va Fargʻona viloyati hokimligi hamkorligida Fargʻona viloyati, shu jumladan Bagʻdod tumanidagi ijtimoiy iqtisodiy obyektlarga media-tur tashkil etildi. 

Media-tur ishtirokchilari dastlab, Fargʻona shahar kasb-hunar maktabida “yashil makon” umummilliy loyihasi asosida tashkil etilgan koʻchat ekish aksiyasida faol ishtirok etishdi. Qayd etish mumkin, mazkur loyiha boʻyicha Fargʻona shahri boʻylab, 2 mln. koʻchat ekilishi rejalashtirilgan, mutasaddilar esa bu koʻrsatkichni 3 millionga yetkazishni maqsad qilinganini taʼkidlashdi. 

Tur doirasida navbatdagi manzil “Fergana Global Textle” MChJ boʻldi. Taʼkidlash joiz mazkur korxona 2018-yilda tashkil etilgan boʻlib, bugungi kunga qadar 1 200 nafar fuqaroni ish bilan taʼminlamoqda. Paxtani oʻzi yetishtirib, uni toʻliq qayta ishlagan holda, mato holatiga keltirib, ularni boʻyash bilan faoliyat yuritadigan “Fergana Global Textle”ning yillik eksport hajmi hozircha, 48 million AQSh dollarni tashkil etadi. Ayni paytda, korxona oʻz mahsulotlarini Turkiya, Xitoy va boshqa bir qancha MDH mamlakatlariga eksport qilmoqda.

Respublika OAV vakillari yoʻl olgan navbatdagi manzil Fargʻona shahrida kelgusidagi 5 yillikda 300 ga yer maydonida bunyod etiladigan zamonaviy “Ekoshahar” boʻldi. Maʼlum qilinishicha, mazkur shaharcha 40 ming aholiga moʻljallangan, zamonaviy shaharga aylanadi. Shuningdek, 250 dan ortiq 9, 12, 16 hamda 25 qavatli uylar, turli ijtimoiy tuzilma obyektlari, 70 ga yer maydonida esa Yangi Oʻzbekiston bogʻi qad rostlaydi.

Viloyatdagi bir qancha bunyodkorlik va obodchalik ishlari bilan tanishgan jurnalistlar viloyatning Oltiariq tumanidagi, tadbirkor Nuriddin Aliqulovga tegishli meva va sabzavotlarni saqlashga moʻljallangan maxsus muzlatgichda ham boʻlishdi. Umumiy 3 200 tonna sigʻimga ega ushbu sovitkich xoʻjalikning 35 gektarlik bogʻida yetishtirilayotgan mevalardan tashqari tumandagi bogʻlarda pishib yetilgan meva, sabzavotlarni sifatli saqlab Oʻzbekiston hamda Xorij bozorlariga chiqishi uchun xizmat qilmoqda.

Ma’lumot uchun, Oltiariq tumanda bunday muzlatgichlar soni 16 ta edi, hozir esa bu koʻrsatkich 103 tani tashkil etmoqda.

• Farg‘ona
• Media-tur