Yig‘ilishda kelgusi yildan qurilishlarda korrupsiyaga qarshi kurashish bo‘yicha yangi tizim yaratilishi ta’kidlanib, Bosh prokuror o‘rinbosari boshchiligida respublika shtabi va viloyat shtablari tuzilishi aytib o‘tilgan. Unga ko‘ra, qurilish narxlarini asossiz oshirish, raqobatni buzish, tasdiqlangan loyihalarni o‘zboshimchalik bilan o‘zgartirish, tanish-bilishchilikka yo‘l qo‘ymaslik ustidan qat’iy nazorat o‘rnatilishi ta’kidlangan.

Shuningdek, kelgusi yilda ipoteka dasturlari doirasida 50 mingga yaqin xonadonli uy-joylar qurilib, bunga qariyb 13 trillion so‘m maqsadli kredit va 1,3 trillion so‘m subsidiya ajratilishi rejalashtirilgan.

"Bu dastlabki hisob-kitoblar. Agar talab bo‘lsa, yana qo‘shimcha resurs ajratiladi", - dedi Prezident.

Bundan tashqari:

- ipoteka kreditlari va subsidiya olishda, uy-joy maydoni va narxi bilan bog‘liq cheklovlar ipoteka kreditlari shartlaridan chiqarib tashlanadi;

- ehtiyojmand aholiga dastlabki badalning bir qismini qoplash uchun 32 million so‘m subsidiya to‘lanadi;

- ehtiyojmand aholi tomonidan kreditni qaytarishda foizning davlat tomonidan qoplab beriladigan subsidiya miqdori barcha hududlar uchun bir xil - 10 foiz etib belgilanadi (hozirda viloyatlarda 10 foiz, Toshkent shahrida 12 foizdan yuqori qismi qoplab berilmoqda);

- subsidiyalar yakka tartibdagi uy-joy qurish va ta’mirlash uchun olingan kreditlar uchun ham beriladi;

- ipoteka kreditini olishda qarindosh bo‘lmagan fuqarolarning kafil bo‘lishiga ruxsat beriladi (bugungi kunda faqat yaqin qarindoshlar kafil bo‘la oladi).

• Prezident
• Videoselektor