Avval xabar berilganidek, Samarqand viloyati Kengashining navbatdagi sessiyasida viloyat hokimi Erkinjon Turdimov Samarqand viloyatni ijtimoiy-iqtisodiy rivojlantirish yuzasidan 2021-yilda amalga oshirilgan ishlar yakunlari hamda 2022-yilgi vazifalar to‘g‘risida xalqqa murojaati bo‘lib o‘tyapti. Murojaat doirasida viloyat hokimi ta’lim tizimini rivojlantirish istiqbollariga ham to‘xtatilib o‘tdi.

Qayd etilishicha, maktab taʼlimini rivojlantirish boʻyicha olis va chekka hududlardagi maktablarda taʼlim sifatini yaxshilash maqsadida Respublika hududlaridan 174 nafar oliy va birinchi malaka toifali pedagoglar jalb qilingan. Joriy yilda 902 ta maktablarda 446 mlrd. soʻmlik mablagʻlar evaziga qurilish-taʼmirlash ishlari olib borilgan.

Taʼkidlanishicha, shu yilning oʻzida, yaqin 30 yil ichida boʻlmagan, tarqoq olis hududlardagi 63 ta maktablarning yangi filiallari qurilgan. Shuningdek, 44 ta yangi ixtisoslashgan maktablar tashkil etilib, ular 87 turdagi oʻquv moddiy texnik jihozlar bilan taʼminlangan.

Oʻz navbatida, viloyatdagi oliy taʼlim muassasalari soni 13 taga yetgan. Jumladan Finlyandiya va AQShning nufuzli universitetlari bilan pedagogika muhandislik-texnologiya yoʻnalishlarida oliygohlar tashkil etilmoqda.

Shuningdek, Narpay va Payariq tumanlarida Samarqand davlat chet tillar institutining fakultetlari tashkil etildi.

Maʼlum qilinishicha, kelgusi yilda ham AQSh bilan hamkorlikda Samarqand muhandislik-texnologiya universiteti tashkil etilishi rejalashtirilgan.

Bundan tashqari, OTMlar va ularning filiallarida 63 ming 338 nafar talaba tahsil olmoqda. Keltirilishicha, bugungi kunda oliy taʼlimda asosiy muammo, talabalar turar joylari yetishmasligidir. Hozirda 17,1 ming oʻrinli turar joyga ehtiyoj mavjud.

Shu maqsadda, kelgusi yilda, davlat xususiy sherikchilik asosida, Samarqand shahrining “Birlik” mahallasida (xalq tilida Makaronka) hamda Rudakiy koʻchasida (sobiq gʻisht zavodi oʻrnida) koʻplab talabalar turar joylari quriladi.

• Samarqand
• Ta'lim
• hokim
• sessiya