Oliy Majlis Qonunchilik palatasidagi “Milliy tiklanish” demokratik partiyasi fraksiyasi yigʻilishida “2022-yil uchun Oʻzbekiston Respublikasining davlat byudjeti toʻgʻrisidagi”gi qonun loyihasi muhokama qilindi.

Tegishli vazirlik va idora rahbarlari ishtirokida oʻtgan yigʻilishda taʼkidlanganidek, qonun loyihasida kelgusi yil uchun Davlat byudjeti daromadlari 200 trln. soʻm yoki YAIMga nisbatan 23,8 foiz miqdorida prognoz qilinmoqda.

Shundan kelib chiqib, 2022-yil uchun Davlat byudjeti xarajatlari 214,8 trln. soʻm miqdorida belgilanmoqda.

Maʼlum qilinishicha, kelgusi yilda ham ijtimoiy soha xarajatlari yana oshiriladi va uning qariyb 45 foizi taʼlimga yoʻnaltirilmoqda. Jumladan, maktabgacha taʼlimga tarbiyalanuvchilar qamrovi oshganligi uchun 8,6 trln. soʻm, xalq taʼlimiga 30,8 trln. soʻm, oʻrta maxsus va oliy taʼlimga esa 7,5 trln. soʻm ajratish koʻzda tutilmoqda.

Shuningdek, olis va chekka hududlarda 1 600 ta bogʻcha tashkil etish uchun 1,5 trln soʻm subsidiya va kompensatsiya ajratilishi, maktablarda taʼlim sifatini oshirish, yangi avlod darsliklarni ishlab chiqish va chop etish uchun Kitob jamgʻarmasiga 605 mlrd. soʻm, maktablarni internet bilan taʼminlash ishlarini yakuniga yetkazish uchun 152 mlrd. soʻm ajratish rejalashtirilyapti.

Bundan tashqari, yigʻilishda 2022-yilda Davlat byudjetidan sogʻliqni saqlash sohasiga 24,0 trln. soʻm mablagʻ yoki joriy yil tasdiqlangan rejaga nisbatan 3,5 trln. soʻm koʻp mablagʻ ajratish koʻzda tutilgani aytildi.

• Davlat byudjeti
• Oliy Majlis