Bugun Xalqaro kongress markazida Prezident Shavkat Mirziyoyev ishtirokida 8-mart – Xalqaro xotin-qizlar kuni munosabati bilan tantanali bayram tadbiri bo‘lib o‘tmoqda.

Shavkat Mirziyoyev mazkur tadbir avvalida nutq so‘zlab, jumladan, 2021-yilda xotin-qizlar masalalarida amalga oshirilgan ishlar xususida to‘xtaldi.

– O‘tgan yili ehtiyojmand oilalarga mansub 2  mingdan ziyod qizlar oliygohlarga grant asosida qabul qilindi, yana shuncha talaba qizlarga kontrakt pullari to‘lab berildi.

Ayollar ta’limiga alohida e’tibor berayotganimiz tufayli, o‘tgan yili oliy o‘quv yurtlariga qabul qilingan talabalarning 60 foizini xotin-qizlar tashkil etdi.

Agar bundan olti yil avval oliygohlarda 110 ming nafar qizlarimiz tahsil olishgan bo‘lsa, bugungi kunda ularning soni 400 ming nafarga yetdi yoki ularning ulushi 2016 yildagi 38 foizdan ayni paytga kelib qariyb 50 foizga yetdi”, – dedi davlat rahbari.

Mirziyoyev, shuningdek, kelgusida Toshkent shahrida xotin-qizlar uchun alohida universitet va uning texnikumlarini tashkil etilishini ma’lum qildi.

– 2022-2026-yillarga mo‘ljallangan Xotin-qizlar ta’limini qo‘llab-quvvatlash milliy dasturi qabul qilindi. Ushbu hujjat doirasida poytaxtda xotin-qizlar uchun alohida universitet va joylarda uning texnikumlarini tashkil etamiz, – dedi Prezident.

Eslatib o‘tamiz, avvalroq barcha talaba qizlarga ta’lim kontraktlarini to‘lash uchun 7 yil muddatga foizsiz kredit berish tartibi joriy qilingani va qizlar ta’limida yana qator imtiyozlar qo‘llanilishi haqida ma’lum qilingan edi.

• Bayram
• Prezident
• Xotin-qizlar
• xabar