Ma’lumotlarga ko‘ra, Keniya mudofaa boshlig‘i va yana to‘qqiz nafar yuqori lavozimli xodim 18-aprel kuni yuz bergan vertolyot halokati oqibatida halok bo‘lgan. Bu haqda “Al Arabia” nashri xabar berdi.

Hodisa yuzasidan Keniya prezidenti Uilyam Ruto milliy xavfsizlik kengashining shoshilinch yig‘ilishini chaqirgan. Mamlakatda juma kunidan boshlab uch kunlik motam e’lon qilindi.

Mudofaa kuchlari boshlig‘i general Frensis Omondi Ogolla halok bo‘lgani rasman tasdiqlangan. Halokat poytaxt Nayrobidan 400 kilometr shimoli-g‘arbda joylashgan Elgeyo Marakvet okrugida sodir bo‘lgan.

“Vertolyot qulagandan keyin alanga olgan. Uning bortida 10 dan ortiq yuqori martabali qo‘mondonlar, jumladan general Ogolla ham bor edi”, deyilgan rasmiy bayonotda.

Ma’lum qilinishicha, halok bo‘lgan 61 yoshli vazir Ogolla o‘tgan yilning aprel oyida mudofaa kuchlari boshlig‘i etib tayinlangan. Halokat sodir bo‘lgan hududga vazir va uning boshqa sheriklari maxsus missiya bilan jo‘natilgan bo‘lgan.

• Halokat
• Mudofaa
• Vertolyot