Shimoliy Koreya yetakchisi Kim Chen Inni olib ketayotgan zirhli poyezd Primore viloyatiga yetib keldi va Rossiya hududiga kirdi.

Mahalliy vaqt bilan taxminan 12:15 da sariq chiziqli zirhli yashil poyezd Razdolnaya daryosi ustidagi ko‘prikdan o‘tib, shimolga qarab yo‘l oldi.

Biroz avval chegara yaqinida joylashgan Xasan viloyati ma’muriyati vakili RIA Novostiga Koreya yetakchisining poyezdi Xasan vokzalidan o‘tganini, biroq u Rossiya chegarasiga soat nechada kirganini aniq bilmasligini aytdi.

Kreml avvalroq Shimoliy Koreya yetakchisi Kim Chen In Rossiya prezidenti Vladimir Putinning taklifiga binoan Rossiya Federatsiyasiga tashrif buyurishini ma’lum qilgan edi.

Bugun, 12-sentyabr kuni ertalab KCNA agentligi Kim Chen Inning Rossiyaga jo‘nab ketishi aks etgan suratlarni chop etdi. Rossiya Federatsiyasi prezidenti matbuot kotibi Dmitriy Peskov muzokaralar Uzoq Sharqda o‘tkazilishini ma’lum qildi, biroq ular aynan qayerda o‘tkazilishiga aniqlik kiritmadi.

• Kim Chen In
• Rossiya
• Shimoliy Koreya