Avvalroq, yo‘laklarda harakatlanuvchi piyodalar uchun sariq nimchalardan foydalanish tartibi joriy etilishi haqida xabar berilgandi. Oliy Majlis Qonunchilik palatasining sobiq deputati, Tabiat resurslari vazirining maslahatchisi Rasul Kusherbayev ushbu tashabbus yuzasidan fikr bildirdi.

“Kelgusida kechqurun yo‘llarda piyoda yurmoqchi bo‘lsak ustimizda nur qaytargichli nimchalar bo‘lishi kerak ekan. Bu yo‘l transport hodisalarining oldini olish, yo‘llarda harakat xavfsizligini ta’minlash, huquqbuzarliklarni oldini olish va hokazolar uchun zarur deyishmoqda. Bu yangilikni o‘qib miyaga kelgan birinchi fikr shu bo‘ldi: demak kimdir nur qaytargichli nimchalar ishlab chiqarmoqchi va uni o‘tkazish kerak. Bunday o‘ylayotganim uchun uzr. Afsuski, bizda ko‘p tashabbuslar aylanib o‘rgilib monopoliyaga borib taqalaveradi, u yog‘iga salohiyat yetmaydi”, – deydi Kusherbayev.

Siyosatchining aytishicha, sariq nimchasiz yurganlik uchun jarima to‘lash yo‘lga qo‘yilishi mumkin.

“Ishqilib bu tashabbus amalga oshib qolmasin deymiz. Aks holda sariq nimchasiz yurganlik uchun ham katta ehtimol bilan jarima to‘lash yo‘lga qo‘yiladi. Bu esa alal-oqibat ko‘chada piyoda yurish ham pullik bo‘ladi, degani”, – deya xulosa qilgan u.

• Rasul Kusherbayev
• Yo'llar
• harakat