Sog‘liqni saqlash vaziri o‘rinbosari Elmira Bositxonova Respublika shoshilinch tibbiy yordam ilmiy markazi Namangan filialida tashkil etilgan matbuot anjumanida Chust tumanidagi ta’lim muassasalari tarbiyalanuvchilarida kuzatilgan zaharlanish holatlari ovqat yoki dori sababidan kelib chiqmaganini ma’lum qildi. Bu haqda Namangan viloyati hokimligi matbuot xizmati xabar berdi.

Qayd etilishicha, Namanganda tashkil etilgan ochiq muloqot chog‘ida jurnalist va blogerlar vazir o‘rinbosariga bolalarning zaharlanishi bilan bog‘liq holat bo‘yicha o‘zilarini qiziqtirgan savollar bilan murojaat qilishgan.

Bositxonova zaharlanish holatlari dori vositalari yoki ovqatdan kelib chiqmaganini alohida ta’kidlab, hozirda 20 ga yaqin analiz xulosalari olingani va chuqurlashtirilgan tahlillardan so‘ng vaziyatga aniqlik kiritishini bildirgan.

“Ijtimoiy tarmoqlarda tarqalayotgan turli xabarlarga ishonavermaslik, bunday jarayonda faqatgina mutaxassislarning fikriga tayanib axborot tarqatilishi kerak. Ayni paytda salomatligidan shikoyat qilib kelayotgan yosh bolalarning 85 foizi sog‘lig‘i joyida, uylariga qaytishga birin-ketin ruxsat berilmoqda. Qolganlari kunning boshida ro‘yxatga olingan bo‘lib, ularning ham ahvoli yaxshilanib bormoqda”, – deydi Elmira Bositxonova.

Ammo vazir o‘rinbosari bolalarning barchasi bir kunda, bir xil shikoyat bilan shifoxonaga tushganiga aynan nima sabab bo‘lganini ochiqlamagan.

• Dori
• SSV
• Zaharlanish