Kongo Demokratik Respublikasida “Islomiy davlat”ga aloqador jangarilar mamlakat sharqidagi qator hujumlar chog‘ida 89 nafar tinch aholini o‘ldirgan.

Bu haqda BMT tinchlikparvar missiyasi (MONUSCO) ma’lumotiga tayanib, Reuters agentligi xabar bermoqda.

Hisobotga ko‘ra, hujumlar Shimoliy Kivu viloyatining bir necha shaharlarida 13–19-noyabr kunlari Ittifoqchi demokratik kuchlar jangarilari tomonidan amalga oshirilgan. O‘lgan 89 kishi orasida kamida 20 nafar ayol va bolalar ham bor.

Bir hujumda jangarilar Byambvedagi katolik cherkovi qoshidagi tibbiyot markaziga hujum qilib, kamida 17 kishi, jumladan, homilador ayollarni o‘ldirgan va bemorlar joylashgan to‘rtta palataga o‘t qo‘ygan.

“MONUSCO Kongo hukumatini zudlik bilan ushbu qirg‘inlarning aybdorlari va sheriklarini aniqlash va ularni javobgarlikka tortish uchun mustaqil va ishonchli tergov o‘tkazishga chaqiradi”, — deyiladi tashkilot bayonotida.

• Kongo
• Terrorchilik