Bugun, 6-noyabr kuni bo‘lib o‘tayotgan O‘zbekiston Prezidentining qasamyod qabul qilish marosimida Shavkat Mirziyoyev Konstitutsiyani takomillashtirish bo‘yicha saylovchilar tomonidan takliflar berilganini aytib o‘tdi.

– Barcha nomzodlarning saylovoldi uchrashuvlarida elektorat vakillari tomonidan bugungi kunda hayotning o‘zi, islohotlarimiz mantig‘i talab etayotgan yana bir muhim taklif ilgari surildi. U ham bo‘lsa, mamlakatimizda konstitutsiyaviy islohotlarni amalga oshirishdan iborat.

Agar dunyo tajribasiga nazar tashlaydigan bo‘lsak, tub burilish davrida ko‘pgina davlatlarda konstitutsiyaviy islohotlar amalga oshirilganini ko‘ramiz.

Shu sababli, avvalo, senator va deputatlarimiz, keng jamoatchiligimiz, xalqimiz bilan yana bir bor maslahat qilib, jahon konstitusiyaviy tajribasini o‘rganib, puxta o‘ylagan holda bugungi va kelgusi taraqqiyotimizni belgilab beradigan Asosiy qonunimizni takomillashtirish masalasini ham ko‘rib chiqishimiz kerak, – dedi Mirziyoyev.

Eslatib o‘tamiz, shu kunga qadar O‘zbekiston Respublikasi Konstitutsiyasiga 14 marta o‘zgartirish va qo‘shimchalar kiritilgan bo‘lib, oxirgi marta 2019-yil 4-sentyabrda saylov to‘g‘risidagi qonun hujjatlari takomillashtirilishi munosabati bilan Asosiy qomusning 96 va 117-moddalarga o‘zgartirishlar kiritilgan.

• Prezident