Jahon sogʻliqni saqlash tashkilotining immunizatsiya va vaksinatsiya masalalari boʻyicha direktori Keyt OʻBrayen koronavirusga qarshi emlash vositalari samaradorligi va xavfsizligi haqida bayonot berdi.

Unga koʻra, COVID-19 profilaktikasida qoʻllanilayotgan vaksinalar xastalik ogʻir oʻtishi, gospitalizatsiya hamda oʻlim holatlarining oldini olishda ishonchli taʼsirga ega. Faqat maksimal samaradorlikka erishish uchun toʻliq bosqichda va buster dozada emlanish zarur.

Bunga, birinchi navbatda, xavf guruhiga mansub aholi qatlami, yaʼni:

– 60 yoshdan oshganlar;

– surunkali kasalliklarga chalinganlar;

– immuniteti zaif bemorlar;

– homilador ayollar;

– tibbiyot xodimlari amal qilishlari kerak.

Oʻz navbatida, JSST masʼuli baʼzi ommaviy axborot vositalarida buster doza keksa yoshli kishilarda insult xavfini keltirib chiqarishi toʻgʻrisidagi xabarlar mutlaqo asossiz ekanligini taʼkidladi.

“Oʻrganishlarimiz davomida mazkur holatlar oʻz tasdigʻini topmadi. Qolaversa, tashkilotga bu borada hech qanday eʼtiroz, shikoyat va shubhali holatlar boʻyicha maʼlumotlar ham kelib tushmagan” — deydi ekspert.

• COVID-19
• JSST
• Vaksina