Dunyoda koronavirusning yangi shtammi tarqala boshlagani o‘zbekistonliklarda ham jiddiy xavotir uyg‘otyapti. Xususan, ko‘pchilik ushbu holat O‘zbekistondagi epidemiologik vaziyatga qanday ta’sir ko‘rsatishi mumkinligi, bunga qarshi ko‘riladigan choralar bilan qiziqmoqda. 

Tibbiyot fanlari doktori, professor Nurmat Atabekov bu boradagi fikr va xulosalari bilan o‘rtoqlashdi.

– Viruslar – oddiy, hujayrasiz organizmlar. Ularda o‘zgaruvchanlik yuzaga kelishi tabiiy hol. Masalan, hozirgacha koronavirusning qo‘zg‘atuvchisi, ya’ni SARS-CoV-2’ning 7 mingdan ziyod mutasiyaga uchragan shtammlari aniqlagan. "Omicron" ham shulardan biri.
Biz yangi shtammning tarqalish o‘chog‘i bo‘lgan Janubiy Afrika davlatlari bilan bevosita aviasiya aloqalari o‘rnatmagan bo‘lsak-da, ushbu kasallik ikkinchi va uchinchi mamlakatlar orqali O‘zbekiston hududiga kirib kelishi ehtimoli yo‘q emas, – deydi N. Atabekov. 

Mutaxassining ta’kidlashicha, SARS-CoV-2’ning ushbu yangi shtammi uchun alohida protokol ishlab chiqish masalasini vaqt ko‘rsatadi. Shunga qaramay, mavjud diagnostika, davolash va profilaktika imkoniyatlaridan samarali foydalanish bu virus turiga qarshi ham natija berishi mumkin.

–  Karantin bilan bog‘liq profilaktik choralar bekor bo‘lgani yo‘q. Ammo odamlarimiz tibbiy niqob taqish, ijtimioy masofa saqlash, antiseptik vositalardan foydalanish  kabi oddiy qoidalarga ham yetarlicha amal qilmay qo‘ygani achinarli holat. 

Yangi shtammning yurtimizga kirib kelishi va aholi o‘rtasida tarqalishining oldini olishda shunday profilaktik chora-tadbirlar juda muhim hisoblanadi, – deydi Atabekov. 

Shuningdek, mutaxassis ommaviy emlanish ko‘rsatkichlarini oshirish orqali ham epidemiologik vaziyatni barqaror saqlab turish mumkinligini ta’kidlaydi.  

– Vaksinalar SARS-CoV-2ning har qanday mutasiyaga uchragan shtammida samara beradi. Hatto yangi shtammni yuqtirib olgan holatda ham barcha dozada emlanganlarda kasallik yengil va jiddiy asoratlarsiz o‘tadi, – deydi u.  

Eslatib o‘tamiz, ayni paytda yurtimizda aholini emlashda jami 6 turdagi — AstraZeneca, ZF-UZ-VAC2001, "Sputnik V", Moderna, Pfizer/BioNTech hamda Sinovac vaksinalaridan foydalanilmoqda.

• Vaksina
• koronavirus