31°
Kechasi 18°
Oliy Majlis Qonunchilik palatasining navbatdagi majlisida “Oʻzbekiston Respublikasining Jinoyat kodeksiga korrupsiyaga oid jinoyatlar uchun javobgarlik muqarrarligini taʼminlashga qaratilgan oʻzgartish va qoʻshimchalar kiritish toʻgʻrisida”gi qonun loyihasi birinchi oʻqishda muhokama qilindi.
Qayd etilishicha, ushbu qonun loyihasi Shavkat Mirziyoyevning 2021-yil 6-iyuldagi tegishli farmonining 6-bandi hamda mazkur hujjat bilan tasdiqlangan Korrupsiyaga qarshi kurashish boʻyicha 2021—2022-yillarga moʻljallangan davlat dasturining 31-bandi ijrosini taʼminlash maqsadida ishlab chiqilgan.
Keltirilishicha, mazkur hujjat bilan Jinoyat kodeksining sakkizinchi boʻlimi “korrupsiyaga oid jinoyatlar” degan yangi atama bilan toʻldirilmoqda. Korrupsiyaga oid jinoyatlar uchun aybdor shaxsga nisbatan jazo choralarini yanada kuchaytirish maqsadida Jinoyat kodeksining 167 va 168-moddalarida koʻrsatilgan jinoyatlar mansab mavqeini suiisteʼmol qilish yoki xizmat mavqeidan foydalanib sodir etilganligi ushbu moddalarning ogʻirroq qismiga oʻtkazilib, mazkur qilmishlar uchun 10 yilgacha ozodlikdan mahrum qilish jazosi nazarda tutilmoqda.
Shuningdek, korrupsiyaga oid jinoyatlar uchun javobgarlikning muqarrarligini taʼminlash, bunday jinoyatlarni sodir etgan shaxslarga yengillashtiruvchi normalarni qoʻllashni cheklash maqsadida qator normalarga oʻzgartish va qoʻshimchalar kiritilmoqda.
Xususan, Jinoyat kodeksining 73 va 74-moddalarida oʻzlashtirish yoki rastrata yoʻli bilan talon-toroj qilish, firibgarlik, soliqlar yoki boshqa majburiy toʻlovlarni toʻlashdan boʻyin tovlash uchun hukm qilingan, biroq jinoyat oqibatida yetkazilgan zararni toʻliq qoplamagan shaxslarga hamda poraxoʻrlik bilan bogʻliq jinoyatlarni sodir etgan shaxslarga nisbatan jazodan muddatidan ilgari shartli ravishda ozod qilish, jazoni yengilrogʻi bilan almashtirish tatbiq qilinmasligi belgilanmoqda.
Majlisda deputatlar tomonidan koʻtarilgan savollarga atroflicha javoblar olinib, mazkur qonun loyihasi birinchi oʻqishda konseptual jihatdan qabul qilindi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
