Britaniyaning “Oksfam” xayriya tashkiloti hisobotiga ko‘ra, Somalida so‘nggi 40 yildagi eng yomon qurg‘oqchilik kuzatilmoqda. Buning oqibatida 2022-yilda millionlab kishi ochlikdan aziyat chekishi mumkin.

“Somalining qariyb 90 foiz aholisi ketma-ket uch mavsum yog‘ingarchiliksiz qolib, qattiq qurg‘oqchilikni boshdan kechirmoqda. Ayrim mintaqalar so‘nggi 40 yildagi eng kuchli qurg‘oqchilikka duch keldi. 3,5 millionga yaqin kishi allaqachon jiddiy oziq-ovqat tanqisligiga uchragan, keyingi yil boshida esa yana millionlab odamlar ocharchilikka duchor bo‘lishi mumkin”, – deyiladi tashkilot hisobotida.

Qayd etilishicha, keyingi mavsumda ekin ekish yoki chorva uchun yaylov topish imkoniyati deyarli yo‘q.

RIA “Novosti” xabariga ko‘ra, Somalida iqlim o‘zgarishi sababli davom etayotgan qurg‘oqchilik, uzoq davom etgan urush, chigirtkalar hujumi va koronavirus pandemiyasi mamlakatda ocharchilikka sabab bo‘ldi.

“Oksfam”ning hisob-kitoblariga ko‘ra, 2022-yilda 7,7 million kishi, ya’ni Somali aholisining qariyb yarmi shoshilinch gumanitar yordamga muhtoj bo‘ladi. Global ochlik indeksiga ko‘ra, Somali 2021-yilda ochlikdan eng ko‘p azob chekayotgan mamlakatga aylandi.

• Global
• Rossiya