Joriy yilning 9-12-yanvar kunlari O‘zbekistonda havo harorati keskin pasayib, -23 darajagacha tushishi mumkinligi e’lon qilindi. Anomal sovuq kirib kelishi e’lon qilingandan so‘ng, maktab va oliy ta’lim muassasalarida ta’til vaqtlari uzaytirildi.

“Yuksalish” umummilliy harakati mazkur ob-havo sharoitidan kelib chiqib, bir nechta taklif bilan chiqdi.

Xususan, agar xodimlarning ish joyida bo'lishiga ehtiyoj bo'lmasa, ular onlayn ishlashiga ruxsat berilishi kerak. Pandemiya bunday formatda ham berilgan vazifalarni samarali bajarish mumkinligini ko‘rsatdi. Qolaversa, bu yo'llarni tirband qilmasdan, qor va muzlardan tozalab olinishiga sharoit yaratadi.

“Shuningdek, barcha ish beruvchilar — ham davlat, ham xususiy sektor ish jarayonlarini tashkil etishni chuqurroq ko'rib chiqishlari kerak. Mehnat sharoitlari bilan tanishib chiqib, xodimlarni qulay harorat rejimi bilan ta'minlashi kerak.

Ish soatlarini, ayniqsa, ochiq havoda ishlaydiganlar uchun qisqartirish maqsadga muvofiq. Imkon qadar xodimlar uchun issiq ichimliklar tashkil qilish, sovuqqotish holatlarining oldini olish uchun tanaffus berish yoki o'rin almashtirish ham foydadan xoli bo'lmaydi”, – deyiladi xabarda.

Yirik savdo va aholiga xizmat ko‘rsatish markazlarida issiq choy taklif qilinishiga ham to‘xtalindi.

Jamoat transportining uzluksiz harakatlanishini ta'minlash kerakligi ta’kidlandi. Chunki, noqulay ob-havoda yo‘llarda yengil avtomobillar soni keskin kamayadi.

“Yuksalish” umummilliy harakati barcha o‘zbekistonliklarning mazkur shartoitda bir-birlariga yordam berishga chaqirgan.

“Muhimi, be'etibor bo‘lmaylik, qishning sovuq kunlarida iliqlik ulashib, bir-birimizga yordam beraylik.

Mahallangizdagi yolg‘iz keksa qo‘shnilar, ko‘p bolali oilalar, farzandini yolg‘iz tarbiyalayotgan onalardan xabar oling. Ulardan isitish tizimi, elektr, gaz borligini so'rang? Balki kimgadir o'tin yoki ko'mir kerakdir? Issiq kiyimlari yo'qdir. O'zingizda borini ular bilan ham bo'lishing. Shaxsiy avtomobilda harakatlanganda ham bir manzilga boruvchi yo‘lovchilarni olib keting” – deydilgan xabar so‘nggida.

• Ob-havo
• Qish mavsumi
• Yuksalish