The Wall Street Journal muxbirlari ikki nafar shimoliy koreyalik askar – 21 yoshli Pek va 26 yoshli Ri bilan gaplashdi. Ikkisi ham ukrainalik harbiylar tomonidan asirga olingan.

Pekning aytishicha, u 17 yoshidan beri KXDR armiyasida to‘pchi sifatida xizmat qilgan – 2021-yilda harbiy xizmatga chaqirilgan. Shundan beri oilasini ko‘rmagan, doimiy ravishda harbiy mashg‘ulotlarda yoki mamlakatning turli hududlarida yirik qurilishlarga yordam berish uchun xizmat safarlarida bo‘lgan.

Ri esa KXDRda snayper sifatida xizmat qilgan. Uning so‘zlariga ko‘ra, uni urushga qatnashishga shimoliy koreyalik komandirlarning “Ukraina safida janubiy koreyalik jangchilar ham bor” degan bayonotlari ilhomlantirgan.

2024-yil noyabrida Pek va boshqa shimoliy koreyalik askarlar poyezd orqali Rossiyaning Sharqiy hududlaridan biriga olib kelingan. U yerda unga Rossiya armiyasining formasi va jihozlari, shuningdek, rus harbiy bileti berilgan. Pek Rossiyaga kelganini faqat yetib kelganidan so‘ng tushunganini aytgan.

Ular Ukraina harbiylari tomonidan asirga olinganidan so‘ng, hozirda Kiyevda davolanmoqda va Janubiy Koreyaga qochish imkoniyatini ko‘rib chiqmoqda. Rasmiy Seul ham ularni qabul qilishga tayyorligini bildirgan.

“Ularning guvohliklari Shimoliy Koreya harbiy kuchlaridagi qattiq tartib-intizom va mafkuraviy tarbiyani ochib beradi. Pek va Ri og‘ir sharoitlarda turli qiynoqlar va katta yo‘qotishlarga duch kelganliklarini ta’kidlashdi”, – deyiladi WSJ xabarida.

• Harbiy xizmatchilar
• Janubiy Koreya
• KXDR
• Rossiya
• Ukraina