Shimoliy Koreyada ikki nafar 16 yoshli o‘smir Janubiy Koreya filmlarini va musiqiy kliplarini tomosha qilgani uchun 12-yillik surgunga hukm qilindi. Bu haqda RBK xabar berdi.

Qayd etilishicha, 2022-yilda tasvirga olingani taxmin qilinayotgan kadrlarda omma oldidagi ochiq sud jarayoni aks etgan. Kulrang xalat kiygan ikki o‘spiringa qo‘l kishanlari taqilgan. Ishtirokchilarning barchasi, shu jumladan o‘smirlarning o‘zi ham niqob taqib olgan, bu esa kadrlar COVID pandemiyasi chog‘ida olingan, deb taxmin qilish imkonini beradi.

Shuningdek, videoyozuvning boshqa bir qismida yigitchalar “o‘z xatolariga iqror bo‘lmagani uchun” stadionda to‘plangan odamlar qarshisida koyib, tanbeh berilayotganini ko‘rish mumkin.

“Chirigan qo‘g‘irchoq rejimi madaniyati hatto o‘spirinlarga ham amal qilmoqda. Ular bor-yo‘g‘i 16 yoshda, biroq allaqachon o‘z kelajaklarini barbod qilib bo‘ldi”, – deyiladi videoda Janubiy Koreya nazarda tutilib.

Avvallari Janubiy Koreya filmlarini tomosha qilish va musiqalarini eshitish bo‘yicha taqiqni buzgan o‘smirlar yoshlar mehnat lagerlariga jo‘natilardi, jazo muddati esa besh yildan oshmasdi. Ammo 2020-yilda KXDRda qabul qilingan qonunga muvofiq, bunday xatti-harakatlar uchun hatto o‘lim jazosigacha bo‘lgan jazolar ko‘zda tutilgan.

Shimoliy Koreyadan kelgan qochoqlardan biri nashrga ma’lum qilishicha, Amerika filmlarini ko‘rganlik uchun pora berib qutilish mumkin, biroq Koreya filmlari bilan qo‘lga tushsa, bu ularning hayotiga tahdid qilishi mumkin. Qochoqning aytib berishicha, bir paytlar Janubiy Koreya musiqasini tinglab, ushbu mamlakat filmlarini do‘stiga uzatgan 22 yoshli yigit otib o‘ldirilganiga guvoh bo‘lgan.

“Janubiy Koreya jamiyatiga havas ko‘zi bilan qarash tez orada tizimning zaiflashuviga olib kelishi mumkin… Bu esa Shimoliy koreyaliklarni Kimlar oilasini hurmat qilishga majburlovchi mafkuraga ziddir”, – deya aniqlik kiritdi SAND bosh direktori, Tokio universiteti siyosatshunoslik doktori, 2001-yilda Shimoliy Koreyadan qochib ketgan Choy Kyon Xi.

Uning taxmin qilishicha, videoyozuv 2022-yilda montaj qilingan. Shimoliy Koreya hukumatini shu narsa xavotirga solmoqdaki, deya fikr bildirdi u, zumerlar va milleniallar “o‘z fikrlash uslubini o‘zgartirgan”, shu sababli Pxenyan shunday choralar ko‘rmoqda.

• Qonun
• Shimoliy Koreya