Latviya 11-avgustdan Belarus bilan chegarada kuchaytirilgan xavfsizlik rejimini joriy qiladi. Bu haqda Latviya hukumati sayti xabar bermoqda.

“8-avgust kuni Vazirlar Mahkamasi chegara xizmatining 2023-yil 11-avgustdan 2024-yilning 10-fevraliga qadar Ludza, Kraslava, Augshdaugava okruglari va Daugavpils maʼmuriy hududlarida olti oy muddatga kuchaytirilgan ish faoliyatini eʼlon qildi”, – deyiladi xabarda.

Ta’kidlanishicha, bu hududlar Belarus bilan chegaradosh.

“Buyruq davlat chegarasi daxlsizligini taʼminlash va davlatga nisbatan sodir etilishi mumkin bo‘lgan tahdidning oldini olish maqsadida, shuningdek, Latviya-Belarus chegarasini noqonuniy kesib oʻtish holatlari, bunday kesib oʻtishga urinishlar va ularning koʻpayishi tendensiyasini hisobga olgan holda chiqarildi”,  deydi Latviya vakili.

Shuningdek, hukumat "butun mintaqa davlatlarining Belarus bilan chegaralarini teng darajada himoya qilish uchun davlat chegarasini noqonuniy kesib o'tishga urinishlarga qarshi yagona va muvofiqlashtirilgan xalqaro harakatlarni ta'minlash juda muhim", – deb qo'shimcha qildi.

• Belarus
• Latviya