Latviya hukumati 23-aprel kuni bo‘lib o‘tadigan yig‘ilishda asosiy ta’limda rus tilidan ikkinchi chet tili sifatida bosqichma-bosqich voz kechish to‘g‘risida qaror qabul qiladi. Bu haqda “Delfi” xabar berdi.

Qayd etilishicha, bugungi kunda latviyalik maktab o‘quvchilari ingliz tilini birinchi chet tili sifatida o‘rganmoqda, ikkinchi chet tilini esa boshlang‘ich maktab oxiridan boshlab o‘rganishni boshlaydi. Bolalar ikkinchi chet tili sifatida fransuz, nemis va boshqa tillarni o‘rganishlari mumkin, ammo amalda rus tili ko‘pincha o‘qitiladi. Chunki maktablarda ko‘pincha boshqa til o‘qituvchilari yo‘q.

Ta’lim va fan vazirligi ma’lumotlariga ko‘ra, Latviya maktablarining deyarli yarmida rus tili ikkinchi chet tili sifatida o‘qitiladi. 2026/2027-o‘quv yilidan boshlab maktablar o‘quvchilarga ikkinchi chet tili sifatida Yevropa Ittifoqi yoki Yevropa iqtisodiy hududiga (EEA) a’zo mamlakatlarning rasmiy tillaridan birini taklif qilishi kutilmoqda. Shunday qilib, rus tili maktab ta’lim tizimidan chiqarib tashlanadi.

• Latviya
• Qaror