O‘zbekiston elchixonasida “Britaniya-O‘zbekiston” jamiyati bilan hamkorlikda taniqli britan shoiri Endryu Stanilend tomonidan ilk bor ingliz tilida nashr etilgan qoraqalpoq she’riyatiga bag‘ishlangan “Three karakalpak poets” (“Uch qoraqalpoq shoirlari”) nomli kitobning taqdimoti tashkil etildi. Bu haqda “Dunyo” axborot agentligi xabar berdi.

Qayd etilishicha, tadbirda Buyuk Britaniya parlamenti, hukumati, ilmiy-akademik, ekspert-tahliliy va jamoat doiralari vakillari hamda ushbu mamlakatda istiqomat qilayotgan vatandoshlar ishtirok etgan.

Elchi Ravshan Usmanov tadbirning ochilish qismidagi nutqida ishtirokchilarni respublikada amalga oshirilayotgan keng ko‘lamli islohotlar va O‘zbekiston-Britaniya hamkorligining hozirgi holati va istiqbollari haqida batafsil so‘zlab bergan.

Xorijiy tomonga, shuningdek, O‘zbekiston rahbariyati tomonidan olib borilayotgan keng ko‘lamli islohotlar, jumladan buyuk ajdodlarimiz boy merosini o‘rganish, ma’rifatparvar vakillarning nomlarini abadiylashtirish, ularning tarixiga oid badiiy asarlar va kinofilmlar yaratish yo‘nalishida olib borilayotgan sa’y-harakatlar haqida ma’lumot berilgan.

“Britaniyalik shoir Endryu Stanilend o‘zining taqdimotida ushbu to‘plam o‘zbekistonlik shoirlar, tarjimonlar va madaniyat xodimlari – Gulbahor Izentayeva, Shahnoza Kengesbay qizi, Aynura Nazirbayeva, Nilufar Abdullayeva, Nargiza Urazimbetova va Gulnaz Jadigerova bilan birgalikdagi ijodiy hamkorlikning mahsuli ekanini ta’kidladi”, deyiladi xabarda.

Mazkur kitobdan qoraqalpoq adabiyotining yirik namoyandalari — Berdaq va Ajiniyoz, shuningdek, zamonaviy qoraqalpoq shoiri Ibroyim Yusupov qalamiga mansub tanlangan she’rlarning ingliz tilidagi tarjimalari o‘rin olgan. To‘plam ilk bor xorijiy tilda so‘zlashuvchilar uchun taqdim etilmoqda.

• London
• Qoraqalpog‘iston