O‘zbekiston Qozog‘istonda bo‘lib o‘tgan voqealardan o‘ziga tegishli xulosa chiqarishi kerak. Bu haqda Belarus prezidenti Aleksandr Lukashenko Kollektiv xavfsizlik shartnomasi tashkiloti Kengashining navbatdan tashqari bo‘lib o‘tgan sessiyasida ta’kidlab o‘tdi.

Uning ta’kidlashicha, Qozog‘iston atrofida Markaziy Osiyodagi sobiq ittifoq davlatlaridagi vaziyatni “portlatishga tayyor” kuchlar to‘planib qolgan.

“Yaqinda Afg‘oniston ham qo‘shildi”, – deydi u.

 “Agar bu saboqlar olinmasa, bizning ma’lumotlarga ko‘ra, ... ularning nazari, jumladan, O‘zbekistonga ham tashlangan”, – deya bashorat qiladi Aleksandr Lukashenko.

Shuningdek, u Qozog‘istonda ro‘y bergan voqealarning ham tashqi, ham ichki sabablari borligini ta’kidladi.

“Buni aniq tushunishib olish kerak. Agar biz buni tushunmasak va faqat tashqi omilni ayblasak, bu voqealarning takrorlanishiga yana guvoh bo‘lamiz”, – deydi u.

Shuningdek, u Tojikiston rahbari bu borada bir necha bor tashkilot doirasida ogohlikka chaqirib kelganini ta’kidladi.

“Tojikiston prezidenti yillar davomida bizdan moddiy yordam, birinchi navbatda harbiy texnika bilan ta’minlashni so‘rab keladi. Va biz buni qilishimiz kerak. Shunday qilib, keyinchalik bu Qozog‘istondagi kabi bizga qimmatga tushmaydi”, – dedi Lukashenko.

 Belarus prezidenti KXShT rahbarlarini Tojikistonni qo‘llab-quvvatlashga, jumladan, harbiy texnika bilan yordam qilishga chaqirdi.

• Belarus
• KXShT
• Rossiya