Belarus prezidenti Aleksandr Lukashenko mamlakat Jinoyat kodeksiga terrorchilik aktlarini sodir etishga urinish uchun o‘lim jazosini nazarda tutuvchi o‘zgartirishlar kiritish haqidagi qonunni imzoladi. Hujjat milliy huquqiy internet portalida e’lon qilingan. 

Ta’kidlanishicha, qonun loyihasi Vakillar palatasi va Belarus Milliy majlisi respublika kengashi tomonidan ma’qullangan. 

Yangi hujjatda “xalqaro asoratlar yoki urush qo‘zg‘atish maqsadida xorijiy davlat yoki xalqaro tashkilot vakilini o‘ldirishga suiqasd qilishga tayyorgarlik ko‘rish”, shuningdek, “suiqasd qilishga tayyorgarlik ko‘rish” uchun o‘lim jazosi qo‘llanilishi ko‘zda tutilgan. 

Shuningdek, jinoyatchi hokimiyatga bosim o‘tkazish yoki aholini qo‘rqitish maqsadida davlat yoki jamoat arbobini o‘ldirishga suiqasd qilishga tayyorgarlik ko‘rgani uchun o‘lim jazosiga hukm qilinishi mumkin.

Qayd etilishicha, o‘zgartirishlar rasmiy e’lon qilingan kundan boshlab 10 kun o‘tgach kuchga kiradi.
 

• Belarus
• Jahon
• Lukashenko
• Terrorizm