Joriy yilning 29-may kuni 16–20-oktabr kunlari Samarqandda boʻlib oʻtadigan Butunjahon turizm tashkiloti (UNWTO) Bosh Assambleyasining 25-sessiyasiga tayyorgarlik koʻrish masalalarini muhokama qilish maqsadida Oʻzbekiston tomonidan tashkiliy qoʻmita oʻrinbosari Aziz Abduhakimov boshchiligidagi Oʻzbekiston Respublikasi delegatsiyasi Madridga tashrif buyurdi.

Tashrif davomida Aziz Abduhakimov UNWTO Bosh kotibi Zurab Pololikashvili va boʻlajak Bosh Assambleyaning asosiy tadbirlari va yordamchi tadbirlarini oʻtkazish uchun masʼul ishchi guruhlar aʼzolari bilan uchrashdi.

Uchrashuvda tadbirlarning dastlabki dasturi, tashkiliy masalalar, yalpi va sessiya majlislari uchun taklif etilayotgan kun tartibi va reglamenti atroflicha muhokama qilindi.

Jumladan, tadbir doirasida Investitsiya forumi, Taʼlim boʻyicha vazirlar paneli sessiyasi, “Yevropa Ittifoqi – Markaziy Osiyo” turizm forumi, ekoturizm festivali, eng yaxshi “sayyohlik qishloqlari”ni taqdirlash marosimi va boshqa tadbirlar oʻtkazilishi rejalashtirilganligi qayd etildi.

Qolaversa, UNWTO Bosh kotibi Z.Pololikashvilining 2022-yil noyabr oyida Oʻzbekistonga tashrifi chogʻida Respublika hukumati tomonidan ilgari surilgan tashabbuslarning amalga oshirilishi, jumladan, Samarqand shahrida UNWTO Xalqaro turizm akademiyasining ochilishi, UNWTO’ning Samarqand shahridagi “Ipak yoʻli” hududiy tematik ofisi, “Ipak yoʻli” xalqaro turizm mukofotini taʼsis etish va bir qator boshqa masalalar borasida ham fikr yuritildi.

Samarqand shahrida boʻlib oʻtadigan Bosh Assambleyadan jahon hamjamiyatini maksimal darajada xabardor qilish maqsadida joriy yilning iyun va oktyabr oylarida jahon ommaviy axborot vositalari vakillari uchun bir qator press-turlar tashkil etish boʻyicha kelishuvga erishildi.

Uchrashuv yakunlari boʻyicha UNWTO Bosh Assambleyasining 25-sessiyasini Samarqand shahrida oʻtkazish toʻgʻrisidagi Bitim imzolandi, uni Oʻzbekiston Respublikasi nomidan UNWTO Bosh Assambleyasini Samarqand shahrida oʻtkazish boʻyicha tashkiliy qoʻmita oʻrinbosari Aziz Abduhakimov va UNWTO Bosh kotibi Zurab Pololikashvili imzoladi.

• Samarqand
• UNWTO
• sessiya