Agar Kiyev tegishli so‘rov yuborsa, Yevropa davlatlari Ukrainaga tinchlikparvar kuchlarni yuborishi mumkin. Bu haqda Fransiya Prezidenti Emmanuel Makron Le Parisien nashriga bergan intervyusida aytib o‘tdi.

Makronning fikricha, Yevropa davlatlar o‘z kuchlarini Ukrainaga safarbar qilishi uchun Rossiyaning xohishi inobatga olinmaydi.

“Ukraina suveren, agar u ittifoqchi qo‘shinlardan o‘z hududida bo‘lishni so‘rasa, unda rozi bo‘lish yoki bo‘lmaslikni Rossiya hal qilmaydi”, – degan Fransiya prezidenti.

Le Parisien’ga ko‘ra, Ukrainada tinchlikparvar kuchlarni joylashtirish rejasi “kelishuvning yakuniy bosqichida” amalga oshiriladi.

Makronning qo‘shimcha qilishicha, G‘arb Kiyevni “uzoq muddatli qo‘llab-quvvatlashini” namoyish etish uchun Yevropaning har bir davlatidan Ukrainaga bir necha ming kishi yuborilishi mumkin. Yevropalik askarlarning “asosiy nuqtalari” Kiyev, Lvov va Odessa bo‘lishi mumkin.

• Fransiya
• Makron
• Rossiya
• Ukraina