Respublika maqsadli kitob jamg‘armasining Vasiylik kengashi darsliklar va mashq daftarlarining ijara to‘lovi miqdorlarini belgiladi. Bu haqda Xalq ta’limi vazirligi matbuot xizmati xabar berdi.

Qayd etilishicha, joriy yilda Prezident Farmoni bilan umumta’lim maktablarining 3, 6, 7 va 10-sinflari uchun to‘liq, shuningdek 2 va 3-sinf uchun mashq daftarlari, barcha sinflar uchun ingliz tili, nemis tili va rus tili fanlaridan jami 60 million nusxa yangi avlod darsliklari (2021-yilda 25 million darslik) chop etilmoqda.

“Yangi darsliklar chop etilish xarajatlarining, xususan dunyo bozorida qog‘oz narxi (faqatgina 2022-yilning o‘zida qog‘oz narxi 60-70 foizga oshgan) va qog‘ozni mamlakatimizga yetkazib berish bo‘yicha transport xarajatlarining keskin oshib ketishi, tabiiyki darsliklarni chop etish uchun xarajatlarning ham oshib ketishiga olib keldi”, – deyiladi xabarda.

Joriy o‘quv yilida o‘rtacha bir dona darslik (mashq daftari) uchun yagona ijara to‘lovi 5707 so‘mni tashkil etmoqda va o‘tgan o‘quv yilidagi miqdorga nisbatan 2967 so‘mga (108 foizga) oshgan.

Ijara to‘lovi summasini ota-onalar darslik to‘plamini to‘liq olgach 1 oktyabrga qadar amalga oshirishlari mumkin.

Qayd etish mumkin, bir qator fuqarolar darslik ijara to‘lovidan ozod etiladi:

– birinchi sinf o‘quvchilari;
–“Ijtimoiy himoya yagona reyestri” axborot tizimiga kiritilgan oilalarning farzandlari;
–“Mehribonlik uy”lari tarbiyalanuvchilari;
–Jismoniy yoki ruhiy rivojlanishida nuqsoni bo‘lgan bolalar uchun ixtisoslashtirilgan maktab va maktab-internatlari o‘quvchilari.

Shuningdek, ushbu xabarga O‘zbekiston Respublikasi Qonunchilik palatasi deputati Rasul Kusherbayev ham munosabat bildirdi. Uning so‘zlariga ko‘ra, kitoblarni pullik ijaraga berish Konstitusiyaga zid.

“O‘zbekiston Respublikasi Konstitusiyasining 41-moddasida “Har kim bilim olish huquqiga ega.

Bepul umumiy ta’lim olish davlat tomonidan kafolatlanadi” deb belgilangan.

Ushbu Konstitusion norma talablaridan kelib chiqilsa, davlat umumta’lim maktablarida ta’lim berish bilan bog‘liq barcha jarayonlar bepul hisoblanadi. Bunda darsliklar bilan o‘quvchilarni ta’minlash ham.

Shu bois, maktablarda darslik kitoblarni pullik ijaraga berish ham Konstitusiyaga zid, deb hisoblaymiz.

Bu bizning nuqtai nazarimiz va uni to‘g‘ri, deb hisoblaymiz. Biroq bu boradagi yakuniy xulosani Konstitusiyaviy sudimiz bildirganida yanada maqsadga muvofiq ish bo‘lardi”, – deya yozga Kusherbayev o‘zining Telegram kanalida.

• Darslik
• Kitob
• Maktab
• Rasul Kusherbayev