Xalq taʼlimi vazirligiga 2022-yil 1-sentyabrga qadar 2023-2024-yillarda maktablarda maʼnan eskirgan kompyuter sinflarini yangilash bo‘yicha dasturni Vazirlar Mahkamasiga tasdiqlash uchun kiritish vazifasi qo‘yildi.

Bu borada imzolangan Prezident qaroriga ko‘ra, 2023-2024-yillarda maktablarda maʼnan eskirgan kompyuter sinflarini yangilash bo‘yicha dasturni moliyalashtirish uchun respublika byudjeti hisobidan 200 milliard so‘m hamda mahalliy byudjetlar hisobidan 200 milliard so‘m miqdorda mablag‘lar ajratiladi.

Bunda Xalq taʼlimi vazirligi 2023-yildan boshlab har yili 1-avgustga qadar Investitsiyalar va tashqi savdo vazirligi hamda Moliya vazirligiga umumiy o‘rta taʼlim muassasalarida maʼnan eskirgan kompyuter texnikasi to‘g‘risida maʼlumotlarni taqdim etib borishlari zarur.

Mazkur vazirliklar birgalikda 2024-yildan boshlab har yili Xalq taʼlimi vazirligi tomonidan taqdim etiladigan maʼlumotlar asosida umumiy o‘rta taʼlim muassasalarini zamonaviy kompyuterlar bilan taʼminlash bo‘yicha moliyalashtirish manbalarini aniqlaydilar.

Shuningdek, 2022/2023-o‘quv yilidan boshlab 400 nafargacha o‘quvchisi bo‘lgan umumiy o‘rta taʼlim muassasalarida Internet tezligi kamida 40 Mbit/s, o‘quvchilar soni 400 nafardan yuqori bo‘lganlarda – kamida 100 Mbit/s bo‘lishi taʼminlanadi.

O‘z o‘rnida yuqori tezlikdagi Internetga ulash uchun Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari umumiy o‘rta taʼlim muassasalarini zarur mablag‘larni ajratadi.

• Qaror
• Xalq ta'limi vazirligi