SSV tomonidan Shayxontohur tumanidagi maktab o‘quvchisida aniqlangan sil kasalligi bo‘yicha yuzaga kelgan epidemiologik vaziyat yuzasidan quyidagilar ma’lum qilindi:

2024-yilning 26-dekabrida Shayxontohur tumanida joylashgan umumta’lim maktabining 11-sinf o‘quvchisida sil kasalligi aniqlangan. Shu kuni bemor Shahar Bolalar ftiziatriya shifoxonasiga yotqizilgan.

Shuningdek, bemor bilan muloqotda bo‘lgan 22 nafar o‘quvchi va maktabning 30 ta o‘qituvchisi joriy yilning 4-yanvaridan boshlab rentgenografiya, diaskin test tekshiruvlaridan o‘tgan. Kasallik aniqlangan o‘quvchi esa ambulator sharoitda davolanmoqda.

Epidemiologik surishtiruv o‘tkazish natijasida bemorning oila a’zolari ham tegishli tekshiruvlardan o‘tkazilib, kasallik aniqlanmagan.

Qayd etilishicha, Sanepidqo‘mita mutaxassislari tomonidan ushbu maktabda epidemiologik o‘rganishlar olib borilishi natijasida maktabda sanitariya talablarining qo‘pol ravishda buzilishi, sil kasalligi bilan kasallangan bemorni erta aniqlanmagani va o‘z vaqtida chora-tadbirlarni tashkil etilmaganligi hamda pedagoglarning davriy tibbiy ko‘rikdan o‘tmaganligi ma’lum bo‘lgan.

Aniqlangan kamchiliklar yuzasidan ushbu maktab direktoriga ma’muriy bayonnoma rasmiylashtirildi.

“Shu o‘rinda ortiqcha vahimaga o‘rin yo‘qligini vaziyat nazorat ostida ekanligini eslatib o‘tamiz”, – deyiladi Sanepidqo‘mita xabarida.

• Maktab
• SSV