“Nasyrul Quran” ma’rifiy majmuasi 2017-yilda ta’sis etilgan bo‘lib, Qur’oni Karimni nashr etish bo‘yicha Madinadagi Qirol Fahd nomidagi majmuadan keyingi dunyodagi ikkinchi eng yirik bosmaxona hisoblanadi. Majmuada Qur’on xattotligi galereyasi, bosmaxona faoliyatini kuzatish nuqtasi va anjuman xonalari faoliyat ko‘rsatadi. Muassasa nashriyot ishidan tashqari, islom xattotlik san’ati va me’morchiligini o‘rganish hamda targ‘ib qilish, Qur’on qo‘lyozmalarining yangi dizaynini ishlab chiqish bilan shug‘ullanadi.
Tashrif davomida majmua direktori Abdullatif Mirasa bilan uchrashuv o‘tkazildi. Malayziya tomoniga respublikada turli jabhalarda olib borilayotgan keng ko‘lamli islohotlar, xususan, diniy-ma’rifiy sohada va ziyorat turizmini rivojlashtirish yo‘nalishida amalga oshirilayotgan chora-tadbirlar haqida batafsil ma’lumot berildi.
Abdullatif Mirasa O‘zbekistonning qadimiy tarixi va betakror madaniy merosi va buyuk allomalarining islom sivilizatsiyasi rivojiga qo‘shgan g‘oyat katta ilmiy, madaniy va ma’naviy hissasini alohida ta’kidladi. Shu o‘rinda, islom sivilizatsiyasi boy merosini chuqur o‘rganish va keng targ‘ib qilish bo‘yicha respublikada amalga oshirilayotgan siyosatni yuqori baholadi.
Suhbatdosh xattotlik O‘zbekistonda fan darajasiga ko‘tarilgan bebaho san’atligini inobatga olgan holda, ushbu yo‘nalishda tajriba almashishni yo‘lga qo‘yishga qiziqish bildirdi.
Uchrashuv davomida Samarqanddagi Hadis ilmi maktabi tomonidan taqdim etilgan Qur’oni Karimning o‘zbek tilidagi tarjimasi va 6 jildlik “Tafsiri irfon” (Qur’oni Karim ma’nolarining o‘zbekcha tarjimasi va tafsiri) Malayziya tomoniga beg‘araz taqdim qilindi.
Muloqot yakunida Malayziya tomoni va Samarqanddagi Hadis ilmi maktabi hamkorligida Qur’onning o‘zbek tilidagi tarjimasini Malayziyada nashr qilish bo‘yicha kelishuvga erishildi.
Shuningdek, xattotlik san’ati bo‘yicha ilg‘or tajriba almashish maqsadida Malayziya vakillarining O‘zbekistonga tashrifini tashkil qilish, tashkilot rahbari boshchiligidagi delegatsiyaning navbatdagi “Xalqaro Ziyorat turizmi haftaligi”da ishtirok etish rejalari belgilandi.
Bundan tashqari, hamkorlikda islom xattotligi bo‘yicha ko‘rgazma tashkil etish, qo‘shma seminar va treninglar, O‘zbekistonning ziyorat turizmini targ‘ib qilish bo‘yicha boshqa ma’rifiy dasturlarni amalga oshirish to‘g‘risida kelishib olindi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!